Toshkent, O’zbekiston (UzDaily.uz) — Ozarbayjonda Ozarbayjon, Turkiya va O‘zbekiston harbiy xizmatchilari ishtirokida «Birlik kuchi – 2026» qo‘shma harbiy mashg‘ulotlari boshlandi. Bu haqda O‘zbekiston Mudofaa vazirligi Axborot va jamoatchilik kommunikatsiyalari departamenti xabar berdi.
Mashg‘ulotlar Ozarbayjonning Qorabog‘ iqtisodiy hududidagi “Qizilqayo” o‘quv-mashg‘ulot markazida boshlandi. Manyovralarda uch mamlakat mudofaa vazirliklarining harbiy xizmatchilari, jangovar texnika, harbiy-dengiz kuchlari va aviatsiya vositalari, shuningdek, uchuvchisiz uchish apparatlari ishtirok etmoqda.
Mashg‘ulotlarning asosiy vazifalari sifatida qo‘shma operatsiyalarga tayyorgarlik darajasini oshirish, bo‘linmalar o‘rtasidagi hamkorlikni takomillashtirish va o‘quv-mashg‘ulot jarayonlarini standartlashtirish belgilangan. Bundan tashqari, ishtirokchilar bo‘linmalarning jangovar qobiliyatini rivojlantirishga qaratilgan vazifalarni amaliy tarzda bajarmoqda.
Ochilish marosimida rahbariyat vakillari turli yo‘nalishlarda ilg‘or tajriba almashish, zamonaviy yondashuv va usullarni o‘rganish, shuningdek, uch mamlakat harbiy bo‘linmalari o‘rtasidagi amaliy hamkorlikni yana-da rivojlantirish muhim ahamiyatga ega ekanini taʼkidladi.
Qayd etilishicha, qo‘shma tayyorgarlik harbiy xizmatchilar oldiga qo‘yilgan vazifalarni bajarish sifatini oshirish, tajriba almashish va ishtirokchilar o‘rtasidagi hamkorlikni mustahkamlashga ham qaratilgan.
Mashg‘ulotlar uch bosqichda o‘tkaziladi. Qorabog‘ iqtisodiy hududidagi “Qizilqayo” o‘quv-mashg‘ulot markazidan tashqari, tadbirlar Naxichevan Muxtor Respublikasidagi “Qorabog‘lar” o‘quv-mashg‘ulot markazi hamda Ozarbayjonning Kaspiy dengizidagi sektorida joylashgan “Byuyuk-Zira” poligonida ham bo‘lib o‘tadi.
