Toshkent, O’zbekiston (UzDaily.uz) — O‘zbekistonlik avtopoygachi Ismoil Ahmedxo‘jayev Belgiyadagi Spa-Frankorsham trassasida bo‘lib o‘tgan Ultimate Cup Series xalqaro seriyasining to‘rtinchi bosqichida Ultimate GT Sprint Cup kategoriyasida g‘oliblikni qo‘lga kiritdi. Bu haqda “O‘zavtosanoat” AJ xabar berdi.
Ahmedxo‘jayev Rossa Racing jamoasi tarkibida Roman Rusinov bilan birga Rossa LM GT avtomobilida ishtirok etdi. Kvalifikatsiya natijalariga ko‘ra, ekipaj ikki marta pol-pozitsiyani qo‘lga kiritdi.
Poyga haftaligi davomida Rossa Racing jamoasi ikki marta shohsupaga ko‘tarildi. Ushbu natijalardan biri Ahmedxo‘jayevga afsonaviy Belgiya trassasida shohsupaning eng yuqori pog‘onasini egallash imkonini berdi.
«Spa — juda texnik trassa, bu yerda har bir davra to‘liq diqqat-eʼtiborni talab qiladi, ayniqsa ob-havo doimiy ravishda o‘zgarib turgan paytda.
Shuning uchun aynan shu yerda, jahon avtosportining eng mashhur trassalaridan birida shohsupaning yuqori pog‘onasida turish va O‘zbekistonni shunday darajada namoyon etish ayniqsa yoqimli. Butun jamoaga mehnati uchun va Romaga ushbu poyga haftaligi uchun rahmat», — dedi Ismoil Ahmedxo‘jayev.
O‘zbekistonlik pilotning xalqaro maydondagi ishtiroki “O‘zavtosanoat” AJ ko‘magida, mamlakatda avtosportni rivojlantirish va O‘zbekistonni xalqaro musobaqalarda namoyon etishga ko‘maklashish doirasida amalga oshirilmoqda.
Avvalroq Roman Rusinov — Ismoil Ahmedxo‘jayev ekipaji Ultimate Cup Series‘ning Italiyaning Mudjello shahridagi Yevropa bosqichida ham ishtirok etgan.
Ultimate Cup Series — bosqichlari Yevropa avtodromlarida o‘tkaziladigan xalqaro poyga seriyasidir.
Uning doirasida GT, prototiplar va formula avtomobillari kategoriyalarida musobaqalar o‘tkaziladi. Ultimate GT Sprint Cup qisqa sprinterlik poygalarini o‘z ichiga oladi, bunda tezlik, barqarorlik va avtomobilni aniq boshqarish hal qiluvchi ahamiyat kasb etadi.
