Toshkent, O’zbekiston (UzDaily.uz) — Qarshi shahrida yo‘l harakati qoidalarini qo‘pol ravishda buzgan, jumladan, voyaga yetmaganlar hayotiga xavf tug‘dirgan Damas avtomobili haydovchisi aniqlandi. Bu haqda Yo‘l harakati xavfsizligi boshqarmasi xabar berdi.
Hodisa ijtimoiy tarmoqlarda tarqalgan. Tekshiruv davomida huquqni muhofaza qiluvchi organlar haydovchining shaxsi va voqea tafsilotlarini aniqladi.
Yo‘l harakati xavfsizligi boshqarmasi maʼlumotlariga ko‘ra, haydovchi Qarshi shahridagi Chulkuvar mahallasi fuqarolar yig‘ini hududida ko‘p qavatli uylar orasida yuqori tezlikda harakatlangan. Profilaktika inspektori va fuqarolar tomonidan to‘xtash haqida berilgan talabga u eʼtibor bermagan.
Haydovchi, shuningdek, haydovchilik guvohnomasi bo‘lmaganini va avtomobilni akasi ruxsatisiz olganini tan olgan. Uning aytishicha, Sho‘rtan mahallasida tezlik meʼyorini buzgan va yo‘lga yugurib chiqqan bolani urib yuborishga oz qolgan.
Haydovchiga nisbatan O‘zbekiston Respublikasi Maʼmuriy javobgarlik to‘g‘risidagi kodeksining 125-moddasi 5-qismi, 128⁵-moddasi 2-qismi, 128¹⁰-moddasi 2-qismi hamda 135-moddasi 2-qismi bo‘yicha maʼmuriy bayonnomalar rasmiylashtirildi.
Damas avtomobili vaqtincha saqlash uchun jarima maydoniga joylashtirildi.
Huquqni muhofaza qiluvchi organlar mazkur haydovchining yo‘l harakati qoidalarini qo‘pol buzishi oqibatida jabrlangan bo‘lishi mumkin bo‘lgan fuqarolarni 102 raqamiga yoki yaqin oradagi ichki ishlar organiga murojaat qilishga chaqirdi.
Yo‘l harakati xavfsizligi boshqarmasi haydovchilarni yo‘l harakati qoidalariga qatʼiy rioya qilishga chaqirdi.
