Oʻzbekiston delegatsiyasi Bishkekda boʻlib oʻtgan ShHT investitsiya biznes forumida ishtirok etdi

Toshkent, O’zbekiston (UzDaily.uz) — Bishkek shahrida ShHTning «Qirgʻiziston – Yevroosiyo yuragi» investitsiya biznes-forumi boʻlib oʻtdi. Mazkur nufuzli tadbirda tashkilotga aʼzo mamlakat hisoblangan davlat organlari, moliya institutlari va ishbilarmon doiralardan 600 dan ortiq delegat qatnashdi.

Investitsiyalar, sanoat va savdo vazirining oʻrinbosari Xurram Teshabayev boshchiligidagi Oʻzbekiston delegatsiyasi forumda faol ishtirok etdi. Delegatsiyamiz rahbari oʻz nutqida Oʻzbekistonda amalga oshirilayotgan iqtisodiy islohotlar hamkorlar uchun keng imkoniyatlar ochayotganini alohida taʼkidlab, ShHT makonida transport-logistika izchilligini kuchaytirish, raqamlashtirish hamda sanoat kooperatsiyasini rivojlantirishga chaqirdi.

Forum doirasida ishtirokchilar sunʼiy intellekt, elektron tijorat, «yashil» transformatsiya va logistika sohalaridagi qoʻshma loyihalarni atroflicha muhokama qildilar.

Muloqot natijasida investitsiya agentliklari oʻrtasida doimiy hamkorlik maydonchasini tashkil etish toʻgʻrisida qoʻshma rezolyutsiya qabul qilindi. Shuningdek, sanoat, infratuzilma va raqamli texnologiyalar sohalarida umumiy qiymati 150 million dollarni tashkil etuvchi 12 ta kelishuv imzolandi. Tomonlar oʻzaro investitsiyalar hajmini yanada oshirishga tayyor ekanliklarini tasdiqladilar.