O‘zbekistonda mahkumlarga onlayn xaridlarga ruxsat berilishi mumkin

Toshkent, O’zbekiston (UzDaily.uz) —  O‘zbekistonda mahkumlarga ruxsat etilgan oziq-ovqat mahsulotlari, buyumlar va boshqa tovarlarni infokiosklar, veb-saytlar hamda mobil ilovalar orqali xarid qilishga ruxsat berilishi mumkin. Ichki ishlar vazirligi ozodlikdan mahrum qilish jazosini ijro etish muassasalarining ichki tartib-qoidalariga tegishli o‘zgartishlar kiritish bo‘yicha loyihani jamoatchilik muhokamasiga taqdim etdi.

Loyihaga ko‘ra, bunday xaridlarni mahkumlarning o‘zlari ham, ularning yaqinlari ham amalga oshirishi mumkin bo‘ladi. Buning uchun jazoni ijro etish muassasalari ichida o‘rnatilgan infokiosklar, shuningdek, tashqi elektron platformalar, jumladan, veb-saytlar va mobil ilovalardan foydalanish taklif etilmoqda.

Jazoni ijro etish muassasalari xarid qilinayotgan tovarlarning tasdiqlangan ro‘yxat va belgilangan texnik talablarga, jumladan, qadoqlash talablariga muvofiqligini nazorat qiladi.

Agar ruxsat etilgan buyumlar yoki predmetlar miqdori belgilangan meʼyordan oshib ketsa, ularni muassasa omborida saqlashga topshirish taklif etilmoqda. Mahkum zarur buyumlarni ombordan tegishli ariza asosida olishi mumkin bo‘ladi.

Jazoni manzil-koloniyalarda o‘tayotgan mahkumlar uchun alohida o‘zgartishlar kiritish taklif qilinmoqda. Loyihaga muvofiq, ularga xarid qilinadigan va o‘zlarida saqlanadigan tovarlarning vazni va miqdori bo‘yicha cheklovlar, shu jumladan, belgilangan oylik limitlar tatbiq etilmaydi.

Loyihada mahkumlarga xarid qilish va o‘zlarida saqlashga ruxsat etilgan oziq-ovqat mahsulotlari, buyumlar va predmetlar ro‘yxatini tasdiqlash ham nazarda tutilgan.

Ro‘yxatga non va un mahsulotlari, makaron va spagetti, tuzlangan va dudlangan baliq, pishloq va sariyog‘, pechenye, vafli, shokolad, konfetlar hamda milliy shirinliklar kiritilgan. Shuningdek, choy va qahva, yangi mevalar va sabzavotlar, yong‘oqlar hamda quritilgan mevalarni xarid qilishga ruxsat berilishi ko‘zda tutilmoqda.

Ro‘yxatdan go‘sht, baliq va sabzavot konservalari, ketchup, mayonez va boshqa souslar, quyultirilgan sut, qatiqsimon quritilgan mahsulot — qo‘rt, lapsha va tez tayyorlanadigan sho‘rvalar ham o‘rin olgan. Ichimliklardan ichimlik suvi va gazlangan suv, limonadlar hamda boshqa ichimliklarga ruxsat beriladi.

Oziq-ovqat mahsulotlaridan tashqari, loyihada ayrim tamaki mahsulotlarini, jumladan, turli xil sigaretalar va nosvoy, shuningdek, oddiy gugurtlarni xarid qilishga ham ruxsat berish nazarda tutilgan. Ro‘yxatda kanselyariya buyumlari ham ko‘rsatilgan.

Bunda ruxsat etilgan barcha tovarlar ularning turi va qadog‘iga nisbatan belgilangan talablarga muvofiq bo‘lishi kerak.