O‘zbekistonda OLX‘ni sotib olish bitimi shartlar asosida maʼqullandi

Toshkent, O‘zbekiston (UzDaily.uz) — Raqobatni rivojlantirish va isteʼmolchilar huquqlarini himoya qilish qo‘mitasi Tapuz Limited kompaniyasining O‘zbekistondagi onlayn eʼlonlar platformasi OLX operatori hisoblangan «OLX Classifieds» XI MCHJdagi 100 foiz ulushni sotib olish bo‘yicha bitimini dastlabki tarzda maʼqulladi.

Arizani ko‘rib chiqish jarayonida qo‘mita xaridorning mulkchilik tuzilmasini tahlil qildi va Tapuz Limited‘ning asosiy aksiyadori TBC Bank Group PLC ekanini aniqladi. O‘zbekistonda mazkur guruh bilvosita raqamli TBC Bank Uzbekistan banki va Payme to‘lov xizmatiga egalik qiladi.

Tahlil davomida Payme va OLX raqamli platformalar bozorida ustun mavqega ega kompaniyalar reyestriga kiritilgani ham qayd etildi. Shu bilan birga, qo‘mita Tapuz Limited mamlakatda onlayn eʼlonlar bozorida faoliyat yuritayotgan boshqa kompaniyalarda ulushga ega emasligini aniqladi.

Ko‘rib chiqish yakunlariga ko‘ra, maxsus komissiya iqtisodiy konsentratsiya bo‘yicha bitimni bir qator majburiy shartlarga rioya qilingan holda maʼqulladi. Xususan, guruhga o‘z nazorati ostidagi boshqa raqamli servislar orqali OLX platformasidan foydalanish shartlariga asossiz taʼsir ko‘rsatish taqiqlandi.

Bundan tashqari, kompaniyaga OLX foydalanuvchilari maʼlumotlaridan raqobatni cheklash yoki TBC Bank Uzbekistan hamda Payme uchun ustunliklarga erishish maqsadida foydalanish, shuningdek raqobatchi tashkilotlar mijozlarining shaxsiy yoki tijorat maʼlumotlarini oshkor qilish taqiqlandi.

Boshqa talablar qatorida bozorda ustun mavqeni suiisteʼmol qilishga yo‘l qo‘ymaslik, isteʼmolchilar huquqlariga rioya qilish va to‘lov usullarini erkin tanlash imkoniyatini taʼminlash belgilandi. Jumladan, OLX foydalanuvchilariga faqat Payme yoki TBC Bank xizmatlarini majburiy tarzda taklif qilishga yo‘l qo‘yilmaydi.

Qo‘mita shuningdek kompaniyani raqobatchi to‘lov tizimlari uchun teng shart-sharoitlarni taʼminlash va raqobatni himoya qilish to‘g‘risidagi qonunchilik talablariga amal qilishga majbur qildi.