Toshkent, O’zbekiston (UzDaily.uz) — Samarqand va Sirdaryo viloyatlarida fuqarolarga pul evaziga Saudiya Arabistoniga “Umra” ziyoratini amalga oshirish uchun safarlarni tashkil etib berishni taklif qilgan ikki kishi ushlandi.
Har ikki holat bo‘yicha jinoiy ishlar qo‘zg‘atilib, tergov harakatlari olib borilmoqda.
Samarqand viloyati Payariq tumanida aviachiptalar sotish shoxobchasi rahbari fuqarolarning “Umra” ziyoratini amalga oshirish uchun safarlarini tashkil etish huquqiga ega bo‘lmaganiga qaramay, mahalliy aholidan biri bilan ishonchli munosabat o‘rnatgan va undan ziyoratni tashkil etish uchun 1150 AQSH dollari talab qilgan.
Tezkor tadbir davomida Davlat xavfsizlik xizmati va ichki ishlar organlari xodimlari ushbu shaxsni talab qilingan pulni olayotgan vaqtida ashyoviy dalillar bilan ushlagan.
Shunga o‘xshash yana bir holat Sirdaryo viloyatida aniqlangan. 1988 yilda tug‘ilgan Guliston tumani aholisi vakili uch nafar fuqarodan Saudiya Arabistoniga safarni tashkil etish uchun jami 3150 AQSH dollari talab qilgan.
Uning aytishicha, safar Toshkentdagi tegishli vakolatlarga ega ekani aytilgan turizm kompaniyasi orqali tashkil etilishi kerak bo‘lgan.
Erkak 3,5 million so‘m miqdorida oldindan to‘lov olayotgan vaqtida Davlat xavfsizlik xizmati, Iqtisodiy jinoyatlarga qarshi kurashish departamenti va ichki ishlar organlari xodimlari tomonidan ashyoviy dalillar bilan ushlangan.
Har ikki holat bo‘yicha ushlangan shaxslarga nisbatan jinoiy ishlar qo‘zg‘atilgan. Ayni paytda tergov harakatlari olib borilmoqda.
