O‘zbekistonda gaz va elektr uchun 73,7 mlrd so‘m to‘landi

Toshkent, O‘zbekiston (UzDaily.uz) — O‘zbekistonda isitish mavsumi davomida kam taʼminlangan oilalarga elektr energiyasi va tabiiy gaz isteʼmoli uchun 73,7 mlrd so‘m miqdorida kompensatsiyalar to‘lab berildi. Bu haqda Energetika vazirligi xabar qildi.

Qo‘llab-quvvatlash mexanizmi O‘zbekiston Respublikasi Prezidentining 2025 yil 2 apreldagi PQ-134-sonli qaroriga muvofiq amalga oshirilmoqda.

Hujjatga ko‘ra, elektr energiyasi bo‘yicha bazaviy meʼyordan ortiq — oyiga 150 kVt·soatgacha bo‘lgan isteʼmol uchun, shuningdek, tabiiy gaz bo‘yicha — 250 kub metrgacha bo‘lgan hajm uchun xarajatlarning bir qismi qoplab beriladi. Bunda kompensatsiya bazaviy tariflar bilan belgilangan meʼyordan ortiq isteʼmol qiymati o‘rtasidagi farqni qoplaydi.

1,3 mlndan ortiq elektr energiyasi kompensatsiyasi bo‘yicha arizalar tahliliga ko‘ra, xonadonlarning 64,9 foizi ijtimoiy meʼyor doirasida 200 kVt·soatgacha isteʼmol qiladi. Yana 19,7 foizi 200 dan 350 kVt·soatgacha oraliqda joylashgan, 15,4 foizi esa 350 kVt·soatdan ortiq isteʼmol qiladi.

Shuningdek, tabiiy gaz isteʼmol qiluvchi 362,8 ming xonadon maʼlumotlari alohida tahlil qilindi. Ulardan 79,4 foizi ijtimoiy meʼyor doirasida 500 kub metrgacha isteʼmol qiladi, 14 foizi 500 dan 700 kub metrgacha, 6,6 foizi esa 700 kub metrdan ortiq isteʼmol qiladi.

Amaldagi qarorga muvofiq, kompensatsiya dasturi 2027 yil 1 aprelgacha amal qiladi.