Toshkent, O’zbekiston (UzDaily.uz) — O‘zbekiston va Tojikiston qo‘shma investitsiya loyihalarini amalga oshirish uchun yana-da qulay sharoitlar yaratishni rejalashtirmoqda.
Ikki tomonlama investitsiya kompaniyasi faoliyatiga kiritiladigan o‘zgartishlar korxonalarni moliyalashtirishni soddalashtirish, shuningdek, ishlab chiqarish uskunalarini sotib olish uchun qo‘shimcha imkoniyatlar yaratishni nazarda tutadi.
Ikki mamlakat hukumatlari o‘rtasidagi bitimga kiritiladigan o‘zgartishlar 1 oktyabr kuni Tojikiston parlamentining quyi palatasi tomonidan maʼqullandi. Hujjat xorijiy valyutadan foydalanish, texnologik uskunalarni olib kirish va tadbirkorlarga moliyalashtirish taqdim etish qoidalarini takomillashtirishni nazarda tutadi.
Yangi mexanizmlar ishlab chiqarish korxonalarini jihozlashda biznes xarajatlarini kamaytirishga yordam berishi kutilmoqda. Bunda lizing vositalaridan ham foydalaniladi. Ushbu mexanizm orqali korxonalar uskunalar qiymatini dastlabki bosqichda to‘liq to‘lamasdan turib, zarur jihozlarga ega bo‘lishi mumkin. Shuningdek, texnologik uskunalar importi uchun yana-da qulay soliq va bojxona shartlari nazarda tutilgan.
Yettita loyiha va 720 dan ortiq ish o‘rni
2026 yil 1 oktyabr holatiga ko‘ra, Tojikiston-O‘zbekiston investitsiya kompaniyasi umumiy qiymati 20,9 mln dollar bo‘lgan yettita loyihani maʼqullagan. Ushbu mablag‘ning 8,9 mln dollari tashabbuslarni amalga oshirish uchun allaqachon yo‘naltirilgan.
Loyihalar iqtisodiyotning bir nechta yo‘nalishlarini rivojlantirishni qamrab oladi. Ular orasida sanoat ishlab chiqarishi, qishloq xo‘jaligi xomashyosini qayta ishlash, oziq-ovqat mahsulotlari ishlab chiqarish va tibbiy xizmatlar ko‘rsatish bor.
Loyihalar yakunlangach, 720 dan ortiq yangi ish o‘rni yaratilishi kutilmoqda.
Kompaniya kapitali 50 mln dollardan oshdi
Ikki tomonlama investitsiya kompaniyasi 2021 yilda tadbirkorlikni qo‘llab-quvvatlash, qo‘shma tashabbuslarni moliyalashtirish va ishlab chiqarish sektorini rivojlantirish maqsadida tashkil etilgan. Kompaniyaning dastlabki kapitali 12 mln dollarni tashkil etgan.
Mablag‘larning asosiy qismi — 75 foizi O‘zbekiston Tiklanish va taraqqiyot jamg‘armasi tomonidan ajratilgan. Qolgan 25 foizini Tojikistonning “Tadjinvest” davlat korxonasi kiritgan.
2026 yil iyul oyida Tojikiston moliya vaziri Fayziddin Qahhorzoda kompaniya kapitali 50 mln dollardan oshganini maʼlum qilgan.
Kompaniya nafaqat loyihalarni moliyalashtirishi, balki faoliyat yuritayotgan yoki yangidan tashkil etilayotgan korxonalar ustav kapitalidagi ulushlarni ham sotib olishi mumkin. Shuningdek, xalqaro moliya tashkilotlaridan mablag‘ jalb qilish imkoniyatiga ega.
Kompaniya faoliyati shartlarini o‘zgartirish bo‘yicha kelishuvlar 2026 yil 26 mart kuni Tojikiston prezidenti Emomali Rahmonning O‘zbekistonga tashrifi chog‘ida imzolangan protokol bilan rasmiylashtirilgan. O‘zbekiston 9 sentyabr kuni zarur ichki davlat tartib-taomillarini yakunlagan.
