Toshkent, O’zbekiston (UzDaily.uz) — O‘zbekistonning Farg‘ona viloyati va Yaponiyaning Kavachinagano shahri o‘rtasida birodarlik munosabatlarini o‘rnatish imkoniyati ko‘rib chiqilmoqda.
Tegishli tashabbus viloyat delegatsiyasining Yaponiyaga tashrifi davomida muhokama qilindi.
Delegatsiyaga Farg‘ona viloyati hokimining o‘rinbosari Xurshidjon Ahmedov boshchilik qildi. Muzokaralarda Kavachinagano shahar deputatlari kengashi raisi Nobuyuki Urayama, shahar meri o‘rinbosari Sakae Nisiguti va Rishton tumani hokimi Bahodirjon Xoliqov ishtirok etdi.
Tomonlar O‘zbekiston va Yaponiya o‘rtasidagi strategik sheriklik munosabatlari rivojlanayotganini taʼkidlab, hududlararo darajadagi hamkorlikni kengaytirish istiqbollarini muhokama qildilar.
Uchrashuvda taʼlim va kommunal xo‘jalik sohalarida tajriba almashish imkoniyatlariga alohida eʼtibor qaratildi. Ishtirokchilar ikki hudud o‘rtasida amaliy hamkorlikni rivojlantirish mumkin bo‘lgan yo‘nalishlarni ko‘rib chiqdilar.
Taklif etilgan tashabbuslarni amalga oshirish Farg‘ona viloyati va Yaponiyaning Kavachinagano shahri o‘rtasidagi aloqalarni mustahkamlash, shuningdek, ikki mamlakat hududlari o‘rtasidagi hamkorlikni kengaytirishga xizmat qilishi kutilmoqda.
