Toshkent, O’zbekiston (UzDaily.uz) — O‘zbekiston Raqobat qo‘mitasi «Navoiy suv taʼminoti» AJ buyurtmasi asosida tashkil etilgan, boshlang‘ich qiymati 15,5 mlrd so‘mni tashkil etgan tender savdolarini o‘tkazishda qonunchilik talablari buzilganini aniqladi. Bu haqda Raqobat qo‘mitasi matbuot xizmati xabar berdi.
Tekshiruv tadbirkorlik subyektlaridan birining murojaati asosida o‘tkazildi. Tender savdolarini o‘rganish jarayonida Qo‘mita mutaxassislari «Navoiy suv taʼminoti» AJ tomonidan O‘zbekiston Respublikasining «Raqobat to‘g‘risida»gi qonuni talablariga rioya etilmagan holatlarni aniqladi.
Aniqlangan qonunbuzilishlar bo‘yicha Raqobat qo‘mitasining Maxsus komissiyasi «Navoiy suv taʼminoti» AJga nisbatan raqobat to‘g‘risidagi qonunchilik talablarini buzganlik fakti yuzasidan ish qo‘zg‘atdi.
Ish belgilangan tartibda ko‘rib chiqilishi natijasida kompaniyaga moliyaviy jarima qo‘llash to‘g‘risida qaror qabul qilindi.
Bundan tashqari, Qo‘mita «Navoiy suv taʼminoti» AJga bajarilishi majburiy bo‘lgan ko‘rsatmalar berdi.
Kompaniya aniqlangan qonunbuzilishlarni bartaraf etishi, shuningdek, kelgusida shunga o‘xshash holatlarga yo‘l qo‘ymasligi lozim.
Raqobat qo‘mitasi xabarida tayinlangan moliyaviy jarima miqdori hamda qonunchilikning aynan qaysi normalari buzilgani aniqlashtirilmagan.
