Toshkent, O’zbekiston (UzDaily.uz) — O‘zbekiston va Qirg‘iziston parlamentlararo hamkorlikni yana-da mustahkamlash hamda ikki mamlakat o‘rtasida erishilgan kelishuvlarni amalga oshirishga ko‘maklashishni davom ettirishga kelishib oldi.
Bu masalalar O‘zbekiston Oliy Majlisi va Qirg‘iziston Jogorku Keneshi o‘rtasidagi hamkorlik bo‘yicha parlamentlararo komissiyaning VI yig‘ilishida muhokama qilindi.
Yig‘ilish Qirg‘iziston Respublikasi Jogorku Keneshida bo‘lib o‘tdi. O‘zbekiston parlament delegatsiyasiga Oliy Majlis Senati raisining birinchi o‘rinbosari, komissiya hamraisi Sodiq Safoyev rahbarlik qildi.
Qirg‘iziston tomonidan delegatsiyaga Jogorku Kenesh Toragasining o‘rinbosari, komissiya hamraisi Jildiz Taalaybek kizi boshchilik qildi.
Ishtirokchilar strategik sheriklikni yana-da rivojlantirish, ikki tomonlama aloqalarni mustahkamlash va avval erishilgan kelishuvlarni amalda bajarish istiqbollarini ko‘rib chiqdi.
Savdo-iqtisodiy va investitsiyaviy hamkorlikni kengaytirish, mintaqalararo va chegaradosh hududlar o‘rtasidagi aloqalarni rivojlantirish, shuningdek, taʼlim, ilm-fan va madaniyat sohalarida qo‘shma tashabbuslarni amalga oshirishga alohida eʼtibor qaratildi.
Tomonlar qonunchilikni takomillashtirish, huquqiy va maʼmuriy to‘siqlarni bartaraf etish hamda parlament nazoratini kuchaytirishda parlamentlarning rolini ham muhokama qildi.
Yig‘ilish yakunida ishtirokchilar ushbu yo‘nalishlardagi qo‘shma ishlarni davom ettirish niyatini tasdiqladi.
