Toshkent, O’zbekiston (UzDaily.uz) — O‘zbekistonning 15 yoshgacha bo‘lgan futbol bo‘yicha o‘smirlar terma jamoasi Ozarbayjonda bo‘lib o‘tadigan tarixdagi ilk FIFA U-15 World Cup Festival 2026 turnirining guruh bosqichidagi raqiblarini bilib oldi.
O‘zbekiston terma jamoasi Qozog‘iston, Bagama orollari, Gana, Guam va Myanma o‘smirlar terma jamoalari bilan birga W guruhidan joy oldi.
Turnir joriy yilning 22–31 oktyabr kunlari Boku shahrida o‘tkaziladi. Unda 191 ta mamlakatning o‘smirlar terma jamoalari ishtirok etadi va ular 32 ta guruhga bo‘lingan.
Guruh bosqichi 24–26 oktyabr kunlari bo‘lib o‘tadi. Musobaqa formati yuqori jadallikni nazarda tutadi: har bir jamoa uch kun davomida beshtadan uchrashuv o‘tkazadi. Ayrim kunlarda terma jamoalar ikkitadan o‘yinda maydonga tushadi.
Pley-off bosqichiga chiqish uchun O‘zbekiston o‘smirlar terma jamoasi guruhda Qozog‘iston, Bagama orollari, Gana, Guam va Myanma vakillaridan yuqori natija qayd etishi kerak bo‘ladi.
Tashkilotchilar bo‘lajak FIFA U-15 World Cup Festival 2026 musobaqasini FIFA uchun eksperimental va tarixiy turnir deb atagan. Bu ushbu yosh toifasidagi futbolchilar uchun shu formatda o‘tkaziladigan birinchi jahon chempionati hisoblanadi.
