Toshkentda yarimmarafonda 24 mingdan ortiq kishi qatnashdi

Toshkent, O’zbekiston (UzDaily.uz) — Toshkentda 24 mingdan ortiq ishtirokchini jamlagan Tashkent International Half Marathon xalqaro yarimmarafoni bo‘lib o‘tdi. Sportchilar va yugurish ishqibozlari 5 kilometr va 21,097 kilometr masofalarda kuch sinashdi.

Ochilish marosimi mamlakat rahbariyati vakillari ishtirokida o‘tkazildi. Tadbir davomida O‘zbekistonda ommaviy sportni rivojlantirish ishlari davom etayotgani, yirik sport musobaqalarining o‘tkazilishi esa faol va sog‘lom turmush tarzini ommalashtirishga xizmat qilayotgani taʼkidlandi.

Yugurish musobaqalari yakunlariga ko‘ra, har ikki masofada g‘oliblar va sovrindorlar aniqlandi.

5 kilometrlik yugurishda erkaklar o‘rtasida Eldor Botirov birinchi o‘rinni egalladi. Ruslan Hojiyev ikkinchi, Behruz Shavkatov esa uchinchi bo‘ldi.

Ayollar o‘rtasida ushbu masofada Alina Hakimova g‘oliblikni qo‘lga kiritdi. Maftuna Ahmedova ikkinchi, Kamola Ablayeva uchinchi o‘rinni egalladi.

Erkaklar o‘rtasida 21,097 kilometrlik yarimmarafonda Andrey Petrov birinchi bo‘lib marraga yetib keldi. Hasan Mirsoatov kumush, Baxtiyor O‘tkirov esa bronza medalini qo‘lga kiritdi.

Ayollar o‘rtasida yarimmarafon g‘olibi Marjona Ahmadaliyeva bo‘ldi. Sadafbonu Nusratulloyeva ikkinchi, Arofatxon Imomaliyeva uchinchi o‘rinni egalladi.