O‘zbekiston palma yog‘i va trans yog‘lar mavjud mahsulotlar ustidan nazoratni kuchaytirmoqda

Toshkent, O‘zbekiston (UzDaily.uz) — O‘zbekistonda palma yog‘i hamda uni o‘z ichiga olgan mahsulotlar va trans yog‘larni majburiy laboratoriya sinovidan o‘tkazish talabi joriy etilmoqda. Bu 30-yanvar kuni Prezident farmoni bilan tasdiqlangan.

1-martdan boshlab mamlakatga olib kiriladigan palma yog‘i, shuningdek, uni va transizomer yog‘ kislotalarini (trans yog‘lar) o‘z ichiga olgan mahsulotlar, jumladan, sut va sut mahsulotlari uchun sanitariya-epidemiologiya xulosasini olishda akkreditatsiyadan o‘tgan laboratoriyalarda majburiy test sinovlari o‘tkaziladi.

Tekshiruvlar amaldagi texnik reglament va standartlarga muvofiq amalga oshiriladi.

Bundan tashqari, mahalliy oziq-ovqat mahsulotlarida palma yog‘idan foydalanish ustidan nazorat kuchaytiriladi. Nazorat organlari oziq-ovqat mahsulotlarini ishlab chiqarish, transportirovka qilish, saqlash va sotish bilan shug‘ullanuvchi korxonalarda inspeksiyalar o‘tkazadi.