Toshkent, O’zbekiston (UzDaily.uz) — O‘zbekistonda moliyaviy xizmatlar sohasidagi tartibga solish “qumdoni” faoliyati tartibi yangilandi. Unda sinovdan o‘tkazishning uchta yo‘nalishi belgilanib, potensial ishtirokchilar doirasi kengaytirildi. Tegishli normativ-huquqiy hujjat Adliya vazirligi tomonidan 2026 yil 19 oktyabrda 3956-son bilan ro‘yxatdan o‘tkazildi. Bu haqda Adliya vazirligi xabar berdi.
Hujjat moliyaviy xizmatlar sohasida maxsus huquqiy rejimni joriy etish va bekor qilish, shuningdek, ushbu rejim doirasida faoliyat yuritish shartlarini tartibga soladi.
Tartibga solish “qumdoni”ning yangilangan modelida uchta alohida yo‘nalish nazarda tutilgan: “innovatsiyalar”, “akseleratsiya” va «texnologik hamkorlik». Ular maxsus huquqiy rejim doirasida moliyaviy xizmatlar va yechimlarni sinovdan o‘tkazish uchun asos bo‘lib xizmat qiladi.
O‘zgarishlar ishtirokchilar tarkibiga ham taalluqli. Endi norezident yuridik shaxslar ham birgalikda ariza beruvchilar sifatida ishtirok etish uchun ariza topshirishi mumkin. Bundan tashqari, faoliyati Markaziy bankdan boshqa davlat organlari tomonidan tartibga solinadigan yuridik shaxslarga ham ishtirok etish imkoniyati berildi.
Yangi moliyaviy xizmatni joriy etishni rejalashtirayotgan kompaniyalar uchun ariza topshirishdan oldin dastlabki maslahat olish mexanizmi joriy etildi. «Pre-application support» deb ataladigan ushbu tartib potensial ishtirokchilarga tartibga solish “qumdoni”da qatnashishga tayyorgarlik ko‘rish bosqichida maslahat olish imkonini beradi.
Hujjatning alohida bandi ishtirokchilar hisobini yuritishga bag‘ishlangan. Tartibga solish “qumdoni” doirasida faoliyat yurituvchi yuridik shaxslarning maxsus reyestrini yuritish tartibi belgilandi.
Yangi talablar sinov tariqasida taqdim etilayotgan moliyaviy xizmatlarni targ‘ib qilishga ham taalluqli. Bunday xizmatlarni ommalashtirishga mo‘ljallangan reklama va axborot materiallarida ular sinovdan o‘tkazish doirasida taklif etilayotgani ochiq ko‘rsatilishi shart.
Yangilangan tartib maxsus huquqiy rejim faoliyatini tashkil etish, unda yuridik shaxslarning turli toifalari ishtirok etishi va isteʼmolchilarni taklif etilayotgan moliyaviy xizmatlarning sinov xususiyati haqida xabardor qilish masalalarini tartibga soladi.
