O‘zbekiston karbamidni CASCA+ yo‘nalishi bo‘yicha Yevropaga eksport qilishni boshladi
Toshkent, O‘zbekiston (UzDaily.uz) — "O‘zbekiston-Yevropa" yo‘nalishida konteyner tashuvlarini kengaytirish doirasida "O‘ztemiryo‘lkonteyner" AJ Sergeli logistika markazidan Italiya, Gretsiya va Bolgariya dengiz portlariga karbamidni konteynerlarda jo‘natishni tashkil etdi.
39 ta qirq futli konteynerdan iborat poyezd CASCA+ yo‘nalishi bo‘ylab harakatlanib, Gruziyaning Poti porti orqali o‘tadi va Burgas (Bolgariya), Pirey (Gretsiya), Neapol va Spetsiya (Italiya) portlariga yetkaziladi. O‘rtacha tranzit vaqti 25-30 kunni tashkil etadi.
Bu qadam O‘zbekistonning eksport imkoniyatlarini kengaytiradi, mamlakatning jahon bozorlaridagi o‘rnini mustahkamlaydi hamda mahsulotlarni yetkazib berishning tez, xavfsiz va raqobatbardosh sharoitlarini yaratadi.
