OTB muhim minerallar bo'yicha ta'minot zanjirini ishga tushirdi

Toshkent, O‘zbekiston (UzDaily.uz) — OTB yangi moliyaviy mexanizm ishga tushirilganini e’lon qildi. Ushbu mexanizm Osiyo va Tinch okeani mintaqasi mamlakatlarini toza energetika, akkumulyatorlar, elektromobillar va raqamli texnologiyalar uchun zarur bo‘lgan o‘ta muhim ahamiyatga ega mineral resurslar yetkazib berish zanjirlarini rivojlantirishda qo‘llab-quvvatlashga qaratilgan.

«O‘ta muhim ahamiyatga ega mineral resurslar keyingi sanoat davrini belgilaydi», — dedi OTB Prezidenti Masato Kanda OTBning 59-yillik yig‘ilishida. «Osiyo va Tinch okeani mintaqasi faqat xom ashyo manbai bo‘lib qolmasligi kerak. Mintaqa ushbu resurslar ta’minlaydigan ish o‘rinlari, texnologiyalar va qo‘shilgan qiymatdan ham foyda ko‘rishi lozim».

«Mazkur mexanizm tezkorlik va adolat tamoyillariga asoslanadi: rivojlanayotgan a’zo mamlakatlarimiz ilg‘or ishlab chiqarish sohasida raqobatlasha olishi va o‘z iqtisodiyotlarida imkoniyatlar yaratishi uchun hozirdanoq mas’uliyatli yetkazib berish zanjirlarini shakllantirishga qaratilgan».

“O‘ta muhim ahamiyatga ega mineral resurslardan ishlab chiqarishgacha” yo‘naltirilgan hamkorlikdagi moliyalashtirish mexanizmi mintaqani foydali qazilmalarni qazib olishdan yuqori qo‘shilgan qiymatga ega tarmoqlarga — jumladan qayta ishlash, ishlab chiqarish va qayta foydalanishga — o‘tishini ta’minlashga qaratilgan. Mazkur mexanizm loyihalarni tayyorlashga ko‘maklashadi, siyosatni isloh qilishni qo‘llab-quvvatlaydi hamda o‘ta muhim ahamiyatga ega mineral resurslar qiymat zanjiri bo‘ylab davlat investitsiyalari va xususiy moliyalashtirishni rag‘batlantiradi.

Mazkur mexanizm ikki tarkibiy qismdan iborat: grant oynasi va katalitik moliyalashtirish oynasi.

Grant oynasi loyihalarni tayyorlashning dastlabki bosqichlarini moliyalashtiradi, jumladan texnik-iqtisodiy asoslash, ekologik va ijtimoiy baholashlar, texnik yordam hamda bilim almashinuvi. Yaponiya hukumati grant oynasiga 20 million AQSH dollari ajratishni, Buyuk Britaniya hukumati esa 1,6 million AQSH dollari ajratishni o‘z zimmasiga oldi.

Katalitik moliyalashtirish oynasi boshqa moliyaviy hamkorlardan qo‘shma moliyalashtirishni jalb etish va xatarlarni taqsimlash uchun mo‘ljallangan. Koreya Eksport-import banki hamda Korea Trade Insurance Corporation ushbu mexanizmning ilk hamkorlari sifatida har biri 500 million AQSH dollari miqdorida memorandumlar imzoladi.

Mazkur mexanizm OTBning 2025 yilgi strategiyasiga tayanadi bo‘lib, u butun mintaqa bo‘ylab o‘ta muhim ahamiyatga ega mineral resurslardan ishlab chiqarishgacha bo‘lgan qiymat zanjirlarini mas’uliyatli va barqaror rivojlantirishga qaratilgan.

OTB allaqachon quyidagi yo‘nalishlarda ko‘mak bermoqda: Hindistonda akkumulyatorlar ishlab chiqarish va qayta ishlashni rivojlantirish; Mongoliyada geologik ma’lumotlarni xaritalashtirish; O‘zbekistonda sun’iy intellektdan foydalangan holda o‘ta muhim metallar ishlab chiqarish va sirkulyar yondashuvlarni joriy etish; Qozog‘istonda o‘ta muhim ahamiyatga ega mineral resurslar bo‘yicha strategiya ishlab chiqish; Filippinlarda esa o‘ta muhim mineral resurslar bo‘yicha yo‘l xaritasini shakllantirish va normativ-huquqiy islohotlarni amalga oshirish.

OTB hamkorlar bilan birgalikda o‘ta muhim ahamiyatga ega mineral resurslar bo‘yicha ma’lumotlar bazasini yaratdi, bu esa yetkazib berish zanjirlari bo‘yicha axborot ta’minotini yaxshilash va davlat siyosatini yanada samarali muvofiqlashtirishga xizmat qiladi. Mazkur mexanizm doirasida qo‘llab-quvvatlanadigan barcha loyihalar OTBning qat’iy ekologik va ijtimoiy talablari, tegishli tekshiruv tartiblari hamda ta’sirni baholash jarayonlariga muvofiq amalga oshiriladi.

Mazkur mexanizm toza energetika va raqamli texnologiyalarga bo‘lgan ortib borayotgan talabni qondirishga qaratilgan bo‘lib, shu bilan birga ish o‘rinlarini yaratish va mintaqada inklyuziv iqtisodiy o‘sishni qo‘llab-quvvatlashga xizmat qiladi.

OTB Osiyo va Tinch okeani mintaqasida barqaror, inklyuziv va tashqi ta’sirlarga chidamli o‘sishni qo‘llab-quvvatlovchi yetakchi ko‘p tomonlama rivojlanish bankidir. OTB o‘z a’zo davlatlari va hamkorlari bilan birgalikda murakkab muammolarni hal etadi, innovatsion moliyaviy vositalar va strategik hamkorliklardan foydalangan holda hayot sifatini yaxshilash, sifatli infratuzilmani rivojlantirish hamda atrof-muhitni muhofaza qilishga xizmat qiladi. 1966 yilda tashkil etilgan OTB 69 ta a’zo davlatga ega bo‘lib, ulardan 50 tasi mintaqaga kiradi.