Misr Avstraliyani penaltilarda yengib, 1/8 finalga chiqdi

Toshkent, O’zbekiston (UzDaily.uz) — Misr milliy terma jamoasi Avstraliya ustidan penaltilar seriyasida g‘alaba qozonib, futbol bo‘yicha jahon chempionatining 1/8 finaliga yo‘l oldi. Dallas shahrida bo‘lib o‘tgan 1/16 final bahsi asosiy va qo‘shimcha vaqt yakunlariga ko‘ra 1:1 hisobida tengma-teng tugaganidan so‘ng, penaltilar seriyasida misrliklar 4:2 hisobida zafar quchdi.

Uchinchi daqiqada Misr terma jamoasi yarim himoyachisi Emam Ashur hisobni ochdi. Ikkinchi bo‘limda esa avstraliyaliklar muvozanatni tiklashga muvaffaq bo‘ldi. Misr himoyachisi Mohamed Hani 55-daqiqada to‘pni o‘z darvozasiga kiritib qo‘ydi va hisob tenglashdi.

Uchrashuv g‘olibi penaltilar seriyasida aniqlandi. Unda Misr futbolchilari to‘rtta zarbani aniq amalga oshirgan bo‘lsa, raqib jamoa faqat ikki marta muvaffaqiyat qozona oldi.

Guruh bosqichida misrliklar G guruhida ikkinchi o‘rinni egallagan edi. Avstraliya terma jamoasi esa D guruhida ikkinchi pog‘onada musobaqani yakunlagan.

1/8 finalda Misr Argentina va Kabo-Verde terma jamoalari o‘rtasidagi bahs g‘olibi bilan to‘qnash keladi. Ushbu uchrashuv Moskva vaqti bilan 4 iyulga o‘tar kechasi bo‘lib o‘tadi, Misr ishtirokidagi navbatdagi o‘yin esa 7 iyul kuni Atlanta shahrida tashkil etiladi.

Jahon chempionati AQSH, Kanada va Meksikada o‘tkazilmoqda hamda 19 iyul kuni yakunlanadi. Amaldagi jahon chempioni Argentina terma jamoasi hisoblanadi.