Kanada terma jamoasi futbol bo‘yicha jahon chempionati 1/8 finaliga chiqqan ilk ishtirokchi bo‘ldi

Toshkent, O’zbekiston (UzDaily.uz) — Kanada milliy futbol terma jamoasi jahon chempionati 1/16 final bosqichida Janubiy Afrika Respublikasi ustidan minimal hisobda g‘alaba qozondi. Los-Anjeles shahrida bo‘lib o‘tgan uchrashuv 1:0 hisobida yakunlandi. Ushbu muvaffaqiyat kanadalik futbolchilarga pley-offning keyingi bosqichiga chiqqan ilk jamoa maqomini taqdim etdi.

Asosiy vaqt davomida tomoshabinlar gol ko‘rishmadi. Uchrashuv taqdiri esa qo‘shimcha vaqtning so‘nggi daqiqalarida hal bo‘ldi. Ikkinchi bo‘limga qo‘shib berilgan vaqtning 90+2-daqiqasida yarim himoyachi Stiven Eushtakiu aniq zarba bilan hisobni ochdi va jamoasiga g‘alaba keltirdi.

Kanadaliklar uchun yana bir muhim voqea jamoa sardori Alfonso Devisning safga qaytishi bo‘ldi. Germaniyaning “Bavariya” klubi himoyachisi jarohat tufayli avvalgi o‘yinlarni o‘tkazib yuborgan edi. U turnirdagi ilk bahsida 75-daqiqada zaxiradan maydonga tushirildi.

Har ikki jamoa ham mazkur mundialda tarixiy natijaga erishdi. Chunki bunga qadar na JAR, na Kanada terma jamoalari jahon chempionatlarining pley-off bosqichiga chiqqan edi. Guruh bosqichi yakunlariga ko‘ra, shimoliy amerikaliklar B guruhida ikkinchi o‘rinni egallagan bo‘lsa, janubiy afrikaliklar ham A guruhida xuddi shunday natija qayd etdi.

JAR terma jamoasining 74 yoshli belgiyalik bosh murabbiyi Xugo Bros jahon chempionatlari tarixida pley-off o‘yinida jamoani boshqargan eng yoshi katta mutaxassis sifatida rekord o‘rnatdi. Avvalgi natija 2018 yilda Urugvay terma jamoasini 71 yoshida boshqargan Oskar Tabaresga tegishli edi.

Shuningdek, Kanada terma jamoasi yana bir o‘ziga xos natijaga erishdi. U mundial mezbonlari orasida o‘z pley-off uchrashuvini mamlakat hududidan tashqarida o‘tkazgan birinchi davlatga aylandi.

Endi 1/8 finalda Kanada Niderlandiya va Marokash o‘rtasidagi bahs g‘olibi bilan kuch sinashadi. Kanadaliklar ishtirokidagi mazkur uchrashuv 4 iyul kuni Xyuston shahrida bo‘lib o‘tadi.

Eslatib o‘tamiz, 2026 yilgi futbol bo‘yicha jahon chempionatiga AQSH, Kanada va Meksika mezbonlik qilmoqda. Amaldagi jahon chempioni Argentina hisoblanadi, final bahsi esa 19 iyul kuni o‘tkaziladi.