Toshkent, O’zbekiston (UzDaily.uz) — O‘zbekistonlik shaxmatchi Javohir Sindorov FIDE Excellence Awards 2026 mukofotining Best Chess Player — Male nominatsiyasida birinchi sovrin sohibi bo‘ldi. Mukofot 2024–2026 yillardagi olimpiya sikli yakunlari bo‘yicha beriladi va shaxmatchining ushbu davrdagi jami natijalarini hisobga oladi.
FIDE Excellence Awards mukofoti Xalqaro shaxmat federatsiyasi (FIDE) tomonidan 2026 yilda taʼsis etilgan va ilk bor topshirilmoqda. Mukofot ikki yillik sikl asosida beriladi hamda jahon shaxmat hamjamiyatida shaxmatchilar, jamoalar, federatsiyalar, musobaqalar va tashabbuslarning yuksak yutuqlarini eʼtirof etishga qaratilgan.
Best Chess Player — Male nominatsiyasida shaxmatchining olimpiya sikli davomidagi umumiy natijalari baholanadi. G‘olibni aniqlashda klassik shaxmat, rapid va blisdagi natijalar, reytingdagi o‘zgarishlar, shuningdek, sport yutuqlarining jahon shaxmat hamjamiyatiga kengroq taʼsiri hisobga olinadi.
So‘nggi ikki yil davomida Javohir Sindorov dunyoning eng kuchli to‘rt shaxmatchisi qatoriga kirdi, Jahon kubogida g‘olib bo‘ldi va Pretendentlar turnirida tarixiy natija qayd etdi.
Pretendentlar turniridagi ishtiroki shaxmatchining ko‘rib chiqilayotgan davrdagi asosiy natijalaridan biri bo‘ldi. Sindorov ushbu musobaqada undan avval boshqa ishtirokchilar erisha olmagan natijani qayd etdi.
Shu tariqa, FIDE Excellence Awards mukofoti bitta alohida turnir natijasini emas, balki Javohir Sindorovning 2024–2026 yillardagi olimpiya sikli davomidagi barcha ishtiroklari va yutuqlari majmuini aks ettiradi.
Mukofot FIDE Excellence Awards tarixida birinchi marta topshirilib, Javohir Sindorovni mazkur ikki yillik davr yakunlari bo‘yicha erkaklar o‘rtasidagi eng yaxshi shaxmatchi nominatsiyasida taqdirladi.
