Toshkent, O’zbekiston (UzDaily.uz) — O‘zbekistonda bolalarga nisbatan jinsiy zo‘ravonlik uchun umrbod ozodlikdan mahrum qilish jazosini joriy etish taklif qilindi. Bu haqda Ijtimoiy himoya milliy agentligi direktorining birinchi o‘rinbosari Shahnoza Mirziyoyeva maʼlum qildi.
Uning so‘zlariga ko‘ra, Ijtimoiy himoya milliy agentligi masʼul davlat idoralari bilan hamkorlikda bir necha oy davomida bolalarni himoya qilish sohasidagi qonunchilikni takomillashtirish bo‘yicha takliflarni ishlab chiqdi.
Tayyorlangan tashabbuslar to‘plami ko‘rib chiqish uchun allaqachon yuborilgan. Asosiy takliflardan biri voyaga yetmaganlarga nisbatan jinsiy zo‘ravonlik uchun jazoni, jumladan, umrbod ozodlikdan mahrum qilishgacha kuchaytirishdan iborat.
Bundan tashqari, bolalarga g‘amxo‘rlik qilish bo‘yicha majburiyatlarni lozim darajada bajarmagan holatlarda ota-onalarning javobgarligini oshirish taklif etilmoqda.
Ayrim o‘zgarishlar pedagoglarga ham taalluqli bo‘lishi mumkin. Xususan, agentlik taʼlim sohasi xodimlarining bolalarga nisbatan zo‘ravonlik ishlatishi va ularni kamsitishi uchun javobgarligini kuchaytirishni taklif qilmoqda.
Taklif etilayotgan choralar zo‘ravonlikdan jabrlangan voyaga yetmaganlar uchun kafolatlarni kengaytirishni ham nazarda tutadi. Gap tergov va sud muhokamasining barcha bosqichlarida ularga yuridik yordam va himoya ko‘rsatilishini taʼminlash haqida bormoqda.
Shahnoza Mirziyoyevaning so‘zlariga ko‘ra, tayyorlangan qonunchilik tashabbuslari bolalar himoyasini kuchaytirish hamda ularning xavfsizligini taʼminlashi lozim bo‘lgan kattalar va mutaxassislarning javobgarligini oshirishga qaratilgan.
