Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev 27 sentyabr kuni turizm sohasi xodimlarini Butunjahon turizm kuni bilan tabriklab, yaqin yillarga mo‘ljallangan maqsadlarni belgilab berdi.
2030 yilga qadar mamlakat yiliga 20 million nafar xorijiy sayyohni qabul qilish, turizmning yalpi ichki mahsulotdagi ulushini 7 foizga yetkazish, turistik xizmatlar eksportini 8 milliard dollardan oshirish va yuqori darajali mehmonxonalar sonini ikki barobar ko‘paytirishni maqsad qilgan. Bu haqda O‘zbekiston Respublikasi Prezidenti matbuot xizmati xabar berdi.
Tabriknomada sohaning rivojlanishi bo‘yicha natijalar ham keltirilgan. 2025 yilda O‘zbekistonga qariyb 12 million nafar xorijiy sayyoh tashrif buyurgan bo‘lib, bu ko‘rsatkich 2016 yildagidan kamida olti baravar ko‘p. Turistik xizmatlar eksporti 11 baravar o‘sib, 4,8 milliard dollarni tashkil etgan. Davlat rahbarining taʼkidlashicha, ochiqlik siyosati, vizani rasmiylashtirish tartibining soddalashtirilishi, transport va mehmonxona infratuzilmasining kengaytirilishi, shuningdek, tadbirkorlar uchun soliq va bojxona imtiyozlarining joriy etilishi soha rivojiga yangi surʼat bermoqda.
Prezident, shuningdek, O‘zbekiston tashabbusi bilan BMT Bosh Assambleyasi 2027 yilni Barqaror va bardoshli turizm xalqaro yili deb eʼlon qilganini qayd etdi. BMTning Jahon turizm tashkiloti O‘zbekistonni dunyodagi eng tez rivojlanayotgan beshta turistik yo‘nalish qatoriga kiritgan.
Murojaatda yangi infratuzilma loyihalari ham sanab o‘tilgan. Xivada xalqaro turistik shaharcha, kongress-markaz va tarixiy-etnografik park tashkil etish, Ichan-Qalʼani esa raqamli texnologiyalar asosida “aqlli” muzey majmuasiga aylantirish rejalashtirilmoqda.
Samarqandda noyob eksponatlar to‘plamiga ega Ipak yo‘li muzeyi barpo etiladi. Qoraqalpog‘istonda arxeologik yodgorliklarga yangi yo‘nalishlar ochiladi, Qashqadaryo viloyatining Shahrisabz tumanida “Gilon” majmuasi, Namangan viloyatining Pop tumanida esa “Arashan” majmuasi tashkil etiladi.
Mirziyoyevning so‘zlariga ko‘ra, respublika aholisi va xorijiy mehmonlarda Yangi O‘zbekistonning vizit kartochkasiga aylangan diqqatga sazovor maskanlar, jumladan, Islom sivilizatsiyasi markazi, Imom Buxoriy va Burhoniddin Marg‘inoniy majmualari, shuningdek, Zamonaviy sanʼat markazi katta qiziqish uyg‘otmoqda.
Sohaning ustuvor vazifalari qatoriga zamonaviy texnologiyalarni joriy etish, yagona milliy turistik platformani ishga tushirish, turistik xizmatlarni yagona tizimga integratsiya qilish, sunʼiy intellektdan foydalanish hamda kadrlar malakasini muntazam oshirish kiritilgan.
Qo‘shimcha qiymati yuqori bo‘lgan yo‘nalishlarni jadal rivojlantirishga alohida eʼtibor qaratish rejalashtirilmoqda. Bular gastronomik, ekologik, ziyorat, tibbiy, tog‘ va sarguzasht, ishbilarmonlik, etno va qishloq turizmini o‘z ichiga oladi.
Davlat rahbari turoperatorlar va turagentlar, mehmonxonalar va oilaviy mehmon uylari xodimlari, gidlar va ekskursovodlar, restoranlar xodimlari, transport va servis kompaniyalari vakillari, hunarmandlar, madaniyat sohasi vakillari, muzey xodimlari va ustozlarga minnatdorlik bildirdi.
U sohaning moddiy-texnik bazasi va kadrlar salohiyatini mustahkamlash, shuningdek, uning xodimlari mehnatini munosib rag‘batlantirish masalalari eʼtibor markazida qolishini taʼkidladi hamda «O‘zbekiston Respublikasida xizmat ko‘rsatgan turizm xodimi» faxriy unvonini taʼsis etishni taklif qildi.
