Farg‘onada chaqalog‘ini sotishga uringan er-xotin hukm qilindi

Toshkent, O’zbekiston (UzDaily.uz) — Farg‘ona shahar jinoyat ishlari bo‘yicha sudi yosh er-xotinni o‘zining yangi tug‘ilgan chaqalog‘ini sotishga uringanlikda aybdor deb topdi va ularning har biriga besh yildan ozodlikdan mahrum qilish jazosini tayinladi.

Ish materiallariga ko‘ra, erkak va ayol 2024 yil oktyabr oyida tanishgan hamda nikohni rasman ro‘yxatdan o‘tkazmasdan va qarindoshlarining xabardorligisiz birga yashay boshlagan. 2025 yil oktyabr oyida ularning o‘g‘li tug‘ilgan.

Sud muhokamasi davomida ayol jinoyatga og‘ir moddiy ahvoli tufayli qo‘l urganini bildirdi.

Uning so‘zlariga ko‘ra, olingan pullar shaxsiy qarzlarini, turmush o‘rtog‘ining kreditlarini to‘lash hamda ishlash maqsadida Turkiyaga borish uchun sarflanishi rejalashtirilgan.

Sudlanuvchi dastlab bolani sotish taklifini rad etganini, ammo tanish ayoli bola «yaxshi sharoitda tarbiyalanishi»ni aytgach, keyinchalik fikrini o‘zgartirganini maʼlum qildi. Uning taʼkidlashicha, turmush o‘rtog‘i bo‘lajak kelishuv haqida faqat u amalga oshiriladigan kuni xabardor bo‘lgan.

Bu holat sababli ular o‘rtasida janjal kelib chiqqan, biroq keyinchalik erkak yordam berishga rozi bo‘lgan. Shundan so‘ng er-xotin ajrashishni rejalashtirgan.

Sud har ikkisini ham O‘zbekiston Respublikasi Jinoyat kodeksining 135-moddasi («Odam savdosi») bo‘yicha aybdor deb topdi va ularning har biriga besh yil muddatga ozodlikdan mahrum qilish jazosini tayinladi.

Shuningdek, sud bolaning keyingi taqdirini belgilash masalasini Ijtimoiy himoya milliy agentligi hamda Qo‘qon shahri hokimligi huzuridagi Bolalarni himoya qilish bo‘limiga topshirish to‘g‘risida qaror chiqardi.