O‘zbekistonga yarim yilda 6,5 mlndan ziyod turist keldi

Toshkent, O’zbekiston (UzDaily.uz) — 2026 yilning yanvar–iyun oylarida O‘zbekistonga turistik maqsadlarda 6 million 565 ming 410 nafar xorijiy fuqaro tashrif buyurdi. Bu haqda Milliy statistika qo‘mitasi xabar qildi.

O‘tgan yilning shu davriga nisbatan xorijiy turistlar soni 1,3 million nafarga yoki 24,9 foizga oshgan.

Eng katta turistik oqim anʼanaviy ravishda qo‘shni davlatlar hissasiga to‘g‘ri keldi. Tashrif buyuruvchilar soni bo‘yicha Qirg‘iziston yetakchilik qildi. Ushbu mamlakatdan O‘zbekistonga 1 million 875 ming 332 nafar kelgan. Ikkinchi o‘rinda 1 million 553 ming 688 nafar turist bilan Qozog‘iston, uchinchi o‘rinda esa 1 million 471 ming 670 safarni amalga oshirgan Tojikiston fuqarolari qayd etildi.

Eng ko‘p turist yuborgan davlatlar birinchi beshtaligiga Rossiya ham kirdi. U yerdan 585 ming 558 nafar turist tashrif buyurgan. Beshinchi o‘rinni esa 238 ming 925 nafar tashrifchi bilan Afg‘oniston egalladi.

Boshqa davlatlar orasida turistlar oqimi bo‘yicha birinchi o‘ntalikka Xitoy — 223 ming 479 nafar, Turkmaniston — 164 ming 211 nafar, Turkiya — 95 ming 466 nafar, Hindiston — 26 ming 450 nafar va Germaniya — 22 ming 294 nafar turist bilan kirdi.

Xorijiy mehmonlar sonining o‘sishi O‘zbekiston turizm sohasining tiklanishi va rivojlanishi davom etayotganini, shuningdek, mamlakatning mintaqa va boshqa davlatlardan keluvchi sayyohlar uchun jozibadorligi ortib borayotganini ko‘rsatadi.