O‘zbekiston TIV rahbari Ozarbayjon elchisini qabul qildi

Toshkent, O’zbekiston (UzDaily.uz) — O‘zbekiston tashqi ishlar vaziri Baxtiyor Saidov 7 iyul kuni mamlakatdagi diplomatik missiyasini yakunlayotgan Ozarbayjonning O‘zbekistondagi Favqulodda va Muxtor elchisi Husayn Guliyevni qabul qildi.

TIV rahbari o‘zining Telegram-kanalida maʼlum qilishicha, uchrashuv davomida diplomatga O‘zbekiston va Ozarbayjon o‘rtasidagi strategik sheriklik va ittifoqchilik munosabatlarini mustahkamlashga qo‘shgan salmoqli hissasi uchun samimiy minnatdorlik bildirildi. Husayn Guliyev respublikada 14 yil davomida faoliyat yuritgan.

Vazirning taʼkidlashicha, Husayn Guliyev o‘z faoliyati davomida nafaqat Ozarbayjonning O‘zbekistondagi vakili sifatida, balki diplomatik korpus duayeni sifatida ham katta hurmatga sazovor bo‘lgan.

Baxtiyor Saidov elchining O‘zbekiston va Ozarbayjon o‘rtasidagi munosabatlarni rivojlantirishdagi xizmatlari mamlakatda yuksak baholanganini qayd etdi. U ko‘p yillik samarali faoliyati eʼtirofi sifatida “Do‘stlik” va «Mehnat shuhrati» ordenlari bilan taqdirlangan.

Vazir Husayn Guliyevga ikki tomonlama hamkorlikni rivojlantirish yo‘lidagi samarali mehnati uchun minnatdorlik bildirib, unga mustahkam sog‘liq, oilaviy baxt va kelgusi faoliyatida ulkan muvaffaqiyatlar tiladi.

Eslatib o‘tamiz, 22 iyun kuni O‘zbekiston Prezidenti Shavkat Mirziyoyev Husayn Guliyevni qabul qilib, O‘zbekiston va Ozarbayjon o‘rtasidagi munosabatlarni mustahkamlashga qo‘shgan katta hissasi uchun uni «Mehnat shuhrati» ordeni bilan taqdirlagan.