Chorvoq suv omborida cho‘kkan ikkinchi shaxsning jasadi topildi
Toshkent, O’zbekiston (UzDaily.uz) — O‘zbekiston Favqulodda vaziyatlar vazirligi g‘avvoslari Chorvoq suv omborida cho‘kib ketgan ikkinchi shaxsning jasadini topdi. Jasad bugun soat 12:07 da aniqlangan. Uchinchi halok bo‘lgan shaxsni qidirish ishlari davom etmoqda. Bu haqda O‘zbekiston FVV xabar berdi.
Hodisa 2 sentyabr kuni Toshkent viloyati Bo‘stonliq tumanida sodir bo‘lgan. Katerda sayr qilish vaqtida oila aʼzolaridan biri cho‘milish uchun suvga sakragan. Erkak qutqaruv jileti bilan taʼminlanmagan va cho‘ka boshlagan.
Unga yordam berish uchun akasi va otasi suvga tashlangan. Natijada uchalasi ham cho‘kib ketgan.
Qutqaruvchilar birinchi jasadni 9 sentyabr kuni soat 13:02 da aniqlagan. G‘avvoslar oilaning kenja o‘g‘lining jasadini topgan.
Bugun soat 12:07 da FVV cho‘kib ketgan ikkinchi aka-ukaning jasadi topilganini maʼlum qildi. Otaning jasadini qidirish ishlari davom etmoqda.
