O‘zbekistonda 8992 nafar hokim yordamchisining barchasi qayta baholanadi
Toshkent, O’zbekiston (UzDaily.uz) — O‘zbekistonda kreditlar, subsidiyalar va kompensatsiyalar ajratish tartibi qayta ko‘rib chiqiladi. Shuningdek, mahallalarda faoliyat yuritayotgan 8992 nafar hokim yordamchisining barchasi qayta baholanadi. Bu haqda Prezident Shavkat Mirziyoyev 3 sentyabr kuni kambag‘allikni qisqartirish va aholi daromadlarini oshirish masalalariga bag‘ishlangan yig‘ilishda maʼlum qildi.
Kreditlar, subsidiyalar va kompensatsiyalar ajratish shartlarini endilikda Prezident farmonlari va qarorlarida belgilab qo‘yish rejalashtirilmayapti. Iqtisodiyot va moliya vazirligi Markaziy bank bilan birgalikda hududlarning salohiyati va o‘ziga xos xususiyatlarini hisobga olgan holda moliyalashtirish mexanizmlarini har chorakda yangilab boradi.
O‘zgarishlar joylardagi hokim yordamchilarining faoliyatiga ham daxl qiladi. Tuman shtablari ularni loyiha asosida ishlash tizimiga o‘tkazishi kerak. Buning uchun 8992 nafar hokim yordamchisining barchasi vaqtincha vazifasini bajaruvchi etib tayinlanadi va shundan so‘ng ularning faoliyati baholanadi.
Qayta baholash natijalariga ko‘ra, tashabbuskor va samarali xodimlar qayta tayinlanadi, belgilangan talablarga javob bermaydiganlar esa almashtiriladi.
Ikki oy ichida xorijiy mutaxassislarni jalb qilgan holda maxsus o‘quv markazini tashkil etish topshirildi. Unda hokim yordamchilariga tadbirkorlik loyihalarini tayyorlash va ularni amalga oshirishga ko‘maklashish o‘rgatiladi.
Yil yakuniga ko‘ra, viloyat shtablari har bir tumandan eng yaxshi ikkitadan hokim yordamchisini Xitoy, Yaponiya va Turkiyaga malaka oshirish uchun yuborishi kerak.
Eng yuqori natija ko‘rsatgan xodimlar uchun alohida malaka darajasini joriy etish va ularning ish haqiga 50 foizgacha ustama belgilash rejalashtirilmoqda.
Shunga o‘xshash yondashuv mahalla bankirlariga ham tatbiq etiladi. Ular ham o‘qitiladi va xorijiy stajirovkalarga yuboriladi.
Bosh prokuraturaga hokim yordamchilari va mahalla bankirlarining mustaqil qaror qabul qilishi hamda masʼuliyatni o‘z zimmasiga olishiga to‘sqinlik qilayotgan omillarni bartaraf etishga ko‘maklashish topshirildi.
Yig‘ilishda tadbirkorlik infratuzilmasi loyihalarini amalga oshirish tizimini o‘zgartirish masalasi ham ko‘rib chiqildi. Hozirda ushbu masalalarning salmoqli qismi viloyat darajasida hal etilmoqda. Hokimliklar bahosiga ko‘ra, bu loyihalarni amalga oshirish muddatlarining cho‘zilishiga olib kelmoqda.
Shu munosabat bilan Prezident buyurtmachi funksiyalarini tumanlarga o‘tkazish va mablag‘larni bevosita joylarga yo‘naltirishni taklif qildi.
“Murakkab” mahallalarda yangi ish o‘rinlarini yaratish uchun respublika byudjetidan mahalliy moliyalashtirish hajmidan ikki-uch baravar ko‘p miqdorda qo‘shimcha mablag‘ ajratish taklif etilmoqda.
Tuman shtabi rahbari tadbirkorlik infratuzilmasi uchun ajratilgan mablag‘lar hisobidan moliyalashtiriladigan loyihalarni ishlab chiqish uchun masʼul bo‘ladi.
Shu bilan birga, tuman shtablariga loyihalashtirish, qurilish va sifat nazorati ishlariga xususiy sektorni jalb qilishga ruxsat beriladi.
Obyektlarni o‘z vaqtida foydalanishga topshirish va sifat talablariga rioya etilishi uchun masʼuliyat esa tuman shtabi rahbari zimmasida saqlanib qoladi.
