Norin ustidagi yangi ko‘prik Namanganni uch tuman bilan bog‘ladi
Toshkent, O’zbekiston (UzDaily.uz) — Namangan viloyatida Norin daryosi ustidan o‘tgan yangi ko‘prik qurilishi yakunlandi. U viloyat markazini Uychi, Uchqo‘rg‘on va Norin tumanlari bilan bog‘laydi.
Loyiha doirasida 17,5 kilometr yangi avtomobil yo‘li ham qurildi. Bu haqda Transport vazirligi huzuridagi Avtomobil yo‘llari qo‘mitasi matbuot xizmati xabar berdi.
Ko‘prikning uzunligi 481,5 metrni tashkil etadi. Vazirlik maʼlumotlariga ko‘ra, u mustaqillik yillarida O‘zbekistonda Norin daryosi ustidan qurilgan eng yirik va eng uzun ko‘priklardan biri bo‘ldi.
Yangi inshoot Uchqo‘rg‘on va Norin tumanlari aholisining viloyat markaziga borish masofasini 20 kilometrga qisqartirishi kerak. Bu haqda Avtomobil yo‘llari qo‘mitasining Namangan viloyati bo‘yicha bosh boshqarmasi bosh muhandisi Tohirjon Orozov maʼlum qildi.
Yo‘lda harakatlanish vaqti va masofasining qisqarishidan tashqari, yangi transport infratuzilmasi O‘zbekiston va Qirg‘iziston chegarasidagi “Uchqo‘rg‘on” va “Kensay” chegara bojxona postlari orqali sayyohlar oqimining ko‘payishiga ham xizmat qilishi kutilmoqda.
Orozovning so‘zlariga ko‘ra, yangi yo‘l Uychi va Norin tumanlarida tirbandliklar hamda yo‘l-transport hodisalari yuzaga kelish xavfini kamaytirish imkonini ham beradi.
Qurilish ishlarini “O‘zyo‘lko‘prik” klasteri Toshkent viloyati filiali amalga oshirdi. Filial direktori o‘rinbosari Sodiqjon Xalilovning so‘zlariga ko‘ra, loyihani amalga oshirishda 100 dan ortiq texnika va 50 nafardan ziyod ishchi jalb qilingan.
Ko‘prik konstruksiyasi 20 ta oraliq tayanchdan iborat. Loyihaning umumiy qiymati 62 milliard so‘mni tashkil etdi.
