Toshkent, O’zbekiston (UzDaily.uz) — O‘zbekiston Prezidenti Administratsiyasi rahbari Saida Mirziyoyeva Ashxobodda Vasiylikka muhtoj bolalarga yordam ko‘rsatish xayriya fondi vitse-prezidenti Og‘uljaxon Atabayeva va Haydar Aliyev fondi vitse-prezidenti Leyla Aliyeva bilan uchrashdi.
Mirziyoyevaning so‘zlariga ko‘ra, Turkmaniston va Ozarbayjon vakillari bilan uchrashuvlar yaxshi anʼanaga aylangan. U tomonlar hamkorlikda ishlash uchun yangi g‘oyalar va imkoniyatlarni izlashda davom etayotganini taʼkidladi.
Mirziyoyeva O‘zbekiston, Turkmaniston va Ozarbayjonni uzoq yillik do‘stlik, o‘zaro ishonch va umumiy qadriyatlar bog‘lab turishini qayd etdi.
U kelgusi uchrashuvlar odamlarga yordam ko‘rsatish va uch mamlakat o‘rtasidagi aloqalarni mustahkamlashga qaratilgan tashabbuslarni amalga oshirishga xizmat qilishidan umid bildirdi.
