Toşkent, Özbekiston (UzDaily.uz) — O‘zbekiston BMTning Iqlim o‘zgarishi to‘g‘risidagi doiraviy konvensiyasi tomonlarining 31-konferensiyasida (COP31) milliy darajada belgilangan hissaning yangilangan variantini (NDC 3.0) taqdim etadi.
Hujjatga muvofiq, mamlakat 2035 yilgacha yalpi ichki mahsulotning har bir birligiga to‘g‘ri keladigan issiqxona gazlari chiqindilarini 2010 yildagi darajaga nisbatan 50 foizga kamaytirishni maqsad qilgan.
Konferensiya 9–20 noyabr kunlari Turkiyaning Antaliya shahrida bo‘lib o‘tadi. Bu haqda O‘zbekiston Milliy ekologiya va iqlim o‘zgarishi qo‘mitasi xabar berdi.
Konferensiyada O‘zbekiston ushbu maqsadga erishish bo‘yicha milliy yondashuvlarini taqdim etadi. Bunda “yashil” energetikani rivojlantirish, energiya samaradorligini oshirish, zamonaviy texnologiyalarni joriy etish va iqtisodiyot tarmoqlarining iqlim o‘zgarishiga barqarorligini mustahkamlashga alohida eʼtibor qaratiladi.
O‘zbekistonning COP31 doirasidagi asosiy tadbirlaridan biri iqlim migratsiyasi va xalqaro hamkorlik masalalariga bag‘ishlanadi.
Milliy pavilyonda yuqori darajadagi tadbir o‘tkazilib, unda iqlim o‘zgarishining migratsiya jarayonlariga taʼsiri, aholining zaif qatlamlarini himoya qilish va hududlarning iqlim o‘zgarishiga barqarorligini oshirish masalalari muhokama qilinadi. Tadbir yakunlari bo‘yicha Markaziy Osiyo va Janubiy Kavkaz mamlakatlarining iqlim migratsiyasi bo‘yicha deklaratsiyasi — «Ipak yo‘li deklaratsiyasi»ni (Silk Road Declaration) qabul qilish rejalashtirilgan.
O‘zbekiston, shuningdek, «Yashil makon» umummilliy loyihasini amalga oshirish va Orol dengizining qurigan tubida o‘rmonzorlar barpo etish bo‘yicha tashabbuslarini taqdim etadi. Boshqa muhim mavzular qatoriga cho‘llanishga qarshi kurashish, biologik xilma-xillikni saqlash va aylanma iqtisodiyotni rivojlantirish ham kiradi.
Milliy pavilyonda mamlakatning iqlim o‘zgarishiga qarshi kurashish, atrof-muhitni muhofaza qilish va barqaror rivojlanish sohalaridagi faoliyati natijalari hamda istiqbolli loyihalari namoyish etiladi.
Pavilyon yangi xalqaro hamkorlar va moliyaviy resurslarni jalb qilish uchun ham maydon vazifasini bajaradi. Qo‘mita pavilyon dasturi va xalqaro uchrashuvlarni hamkor tashkilotlar bilan birgalikda tayyorlamoqda.
Qo‘mita bahosiga ko‘ra, konferensiyada ishtirok etish O‘zbekistonning iqlimni moliyalashtirish mablag‘larini jalb qilish, qo‘shma loyihalarni rivojlantirish va ekologik barqarorlikni taʼminlash imkoniyatlarini kengaytiradi.
