Britaniyaning bp kompaniyasi Shimoliy Ustyurt neft va gaz loyihasiga qo'shildi

Toshkent, O‘zbekiston (UzDaily.uz) — Britaniyaning bp energetika kompaniyasi Qoraqalpog'iston Respublikasidagi oltita neft va gaz bloklarini qamrab oluvchi O'zbekistondagi Shimoliy Ustyurt loyihasi bo'yicha mahsulot taqsimoti to'g'risidagi bitimga rasman qo'shildi.

Mazkur bitim Qoraqalpog‘iston Respublikasining Ustyurt mintaqasida joylashgan Boyterak, Terengquduq, Birqori, Haroy, Qoraqalpoq va Qulboy bloklarini qamrab oladi.

Toshkent shahrida o‘tkazilgan “O‘zbekiston neft va gazi – 2026” xalqaro konferensiyasi doirasida imzolangan kelishuvda O‘zbekiston Respublikasi Energetika vaziri Jo‘rabek Mirzamahmudov, “O‘zbekneftgaz” AJ boshqaruv raisi Abdug‘ani Sanginov, Ozarbayjon Respublikasining SOCAR kompaniyasi prezidenti Rovshan Najaf hamda “bp” kompaniyasining Ozarbayjon, Gruziya va Turkiya bo‘yicha mintaqaviy prezidenti Djiovanni Kristofoli ishtirok etdi.

Mazkur loyiha kompaniyaning O‘zbekistondagi ilk tashabbusi bo‘lib, u “O‘zbekneftgaz” va SOCAR bilan hamkorlikda amalga oshiriladi.

Katta resurs salohiyatiga ega bulgan ushbu loyiha neft-gaz resurslarini qidirish va o‘zlashtirish ishlarini amalga oshirish va uzoq muddatli manfaatlar yaratishga xizmat qiladi. Shuningdek, mazkur mahsulot taqsimotiga oid bitim (MTB) “bp” kompaniyasining kidiruv portfelini kengaytirish va uzoq muddatli o‘sish strategiyasining muhim qismi ekani qayd etildi.

Bitimdagi tomonlarning ulushlari quyidagicha belgilangan: “bp” kompaniyasi – 40 foiz, “SOCAR” kompaniyasi – 30 foiz va “O‘zbekneftgaz” AJ – 30 foiz.

Ushbu MTB dastlab 2025-yil 24-iyul kuni O‘zbekiston Respublikasi Energetika vazirligi, “O‘zbekneftgaz” va SOCAR o‘rtasida imzolangan. Ayni paytda loyiha birinchi bosqichda bo‘lib, SOCAR operator sifatida seysmik qidiruv ishlarini olib bormoqda.