AQSH va O‘zbekiston 2026–2027 yillarga mo‘ljallangan harbiy hamkorlik rejasini belgiladi

Toshkent, O’zbekiston (UzDaily.uz) — Amerika Qo‘shma Shtatlari O‘zbekiston bilan harbiy hamkorlikni yana-da mustahkamlash va respublika harbiy xizmatchilarining kasbiy mahoratini oshirishga qatʼiy sodiqligini tasdiqladi. Amerika tomoni mudofaa sohasida Toshkent bilan uzoq yillik va muvaffaqiyatli sheriklikdan faxrlanishini bildirdi.

Ikki tomonlama munosabatlarni chuqurlashtirish masalalari AQSH Markaziy qo‘mondonligi Quruqlik qo‘shinlari qo‘mondoni o‘rinbosari general-mayor Maykl Linining O‘zbekiston Respublikasi Milliy gvardiyasi vakillari bilan uchrashuvining asosiy mavzusi bo‘ldi.

Muzokaralar davomida tomonlar qo‘shma ishlarning joriy natijalarini batafsil tahlil qildi va yaqin istiqbol uchun strategik ustuvor yo‘nalishlarni belgilab oldi. Muhokamalarning asosiy eʼtibori 2026–2027 yillarga mo‘ljallangan ikki tomonlama hamkorlikning batafsil rejasini kelishish va tasdiqlashga qaratildi.

Suhbatdoshlar, shuningdek, o‘zbekistonlik mutaxassislarning sohaviy taʼlim imkoniyatlarini kengaytirish bo‘yicha kelishuvga erishdi. Gap Amerika tomoni muvofiqlashtiradigan Xalqaro harbiy taʼlim va tayyorgarlik dasturi (IMET) salohiyatidan yana-da faolroq foydalanish haqida bormoqda.

Uchrashuv ishtirokchilari to‘plangan tajriba almashinuvi va sifatli sohaviy taʼlim kuch tuzilmalari uchun yuqori malakali kadrlar tayyorlashda hal qiluvchi ahamiyatga ega ekanini alohida taʼkidladi.

Tomonlar fikricha, mazkur yo‘nalishdagi qo‘shma saʼy-harakatlar butun Markaziy Osiyo mintaqasida barqarorlikni taʼminlashga salmoqli hissa qo‘shadi hamda xavfsiz kelajakni shakllantirish uchun mustahkam asos bo‘lib xizmat qiladi.