YHTEM Toshkentda yo‘llar yuklamasini 6 ballda ushlab turdi

Toshkent, O’zbekiston (UzDaily.uz) — Toshkent ko‘chalarida transport oqimi yangi o‘quv yilining birinchi kuni — 2 sentyabr kuni odatiy ish kuni bo‘lgan 24 avgustga nisbatan 30 foizga oshdi.

Avtomobillar soni ko‘payganiga qaramay, shahar bo‘yicha yo‘llar tirbandligi ko‘rsatkichini 6 ball darajasida ushlab turishga erishildi. Bu haqda Toshkent shahar Yo‘l harakatini tashkil etish markazi (YHTEM) xabar berdi.

Poytaxtning ayrim hududlarida harakat sekinlashgan bo‘lsada, tirbandlikning keskin ortishiga yo‘l qo‘yilmadi.

YHTEM maʼlum qilishicha, transport oqimining 30 foizga oshishi o‘zaro bog‘langan chorrahalar tarmog‘iga sezilarli yuklama yuklaydi. Chunki ularning o‘tkazuvchanlik qobiliyati chegaraga yaqinlashganda, avtomobillar sonining ozgina ko‘payishi ham navbatlarning sezilarli darajada uzayishiga olib kelishi mumkin.

Yo‘llardagi vaziyatni nazorat qilish Toshkent shahar YHTEMning Vaziyatlar markazi orqali amalga oshiriladi. Raqamli tizimga shaharning deyarli barcha asosiy tartibga solinadigan chorrahalari ulangan. Mutaxassislar real vaqt rejimida transport harakati, svetoforlarning ishlashi, navbatlarning shakllanishi va jamoat transporti harakatini kuzatib boradi.

Ertalabki, kunduzgi va kechki vaqt oraliqlari, shuningdek, taʼlim muassasalari atrofidagi va eng ko‘p yuklangan magistrallardagi vaziyat alohida tahlil qilinadi. Bunday monitoring mahalliy qiyinchilik qo‘shni ko‘chalarga tarqalishidan oldin navbatlarning ortib borayotganini aniqlash imkonini beradi.

Navbat uzayganida mutaxassislar harakat intensivligi va tutash hududlardagi vaziyatni baholaydi. Vaziyatga qarab yashil signal davomiyligi tuzatiladi, svetofor fazalari o‘zgartiriladi va qo‘shni svetoforlarning ishlashi sinxronlashtiriladi. O‘zgartishlar kiritilganidan keyin natijani baholash uchun harakat kuzatishda davom etadi.

Agar tirbandlikka yo‘l-transport hodisasi, to‘xtab qolgan avtomobil, harakat polosasining to‘silishi, yo‘l ishlari yoki to‘xtash qoidalarining buzilishi sabab bo‘lsa, maʼlumot Toshkent shahar IIB Jamoat xavfsizligi boshqarmasi Jamoat xavfsizligi xizmati Yo‘l harakati xavfsizligi boshqarmasi xodimlariga yetkaziladi. Zarur hollarda voqea joyida qo‘lda tartibga solish, harakat polosasini bo‘shatish yoki xavfsiz aylanma yo‘lni tashkil etish ishlari amalga oshiriladi. Shuningdek, yo‘l, kommunal, avariya va boshqa ixtisoslashtirilgan xizmatlar ham ishga jalb qilinishi mumkin.

Ishlarni muvofiqlashtirish uchun Vaziyatlar markazida Toshkent shahar YHTEM, Toshkent shahar Transport va yo‘l-transport infratuzilmasini rivojlantirish bosh boshqarmasi, Toshkent shahar IIB Jamoat xavfsizligi boshqarmasi Jamoat xavfsizligi xizmati Yo‘l harakati xavfsizligi boshqarmasi hamda jamoat transporti dispetcherlik xizmatlari vakillaridan iborat ishchi guruh faoliyat yuritadi. Uning ishida muhandislar, transport modellashtirish bo‘yicha mutaxassislar, tahlilchilar va dasturchilar ham ishtirok etadi.

O‘zbekistonlik mutaxassislar bilan birgalikda yo‘llardagi vaziyatni xorijiy ekspertlar ham tahlil qilmoqda. Ular transport oqimlarining taqsimlanishi, tirbandliklar yuzaga kelish sabablari va qabul qilinayotgan qarorlarning samaradorligini o‘rganmoqda.

YHTEM maʼlum qilishicha, yaqin kunlarda monitoring kuchaytirilgan tartibda davom ettiriladi.

Oliy taʼlim muassasalari, akademik litseylar, texnikumlar va boshqa taʼlim muassasalarida darslar boshlanishi bilan shahar yo‘llariga tushadigan transport yuklamasi bosqichma-bosqich oshishi mumkin.