Samarqand delegatsiyasi AQSHda sog‘liqni saqlash tajribasini o‘rganmoqda

Toshkent, O’zbekiston (UzDaily.uz) — Samarqand viloyati delegatsiyasi ishchi tashrif bilan AQSHda bo‘lib, sog‘liqni saqlashni tashkil etishning ilg‘or tajribasini o‘rganmoqda hamda amerikalik hamkorlar bilan yangi loyihalarni muhokama qilmoqda. Delegatsiya tarkibidan hokimlik, sog‘liqni saqlash tizimi va xususiy tibbiyot sektori, jumladan, «Meros International Hospital» klinikasi vakillari o‘rin olgan.

Tashrifning asosiy maqsadlaridan biri AQSHning Project C.U.R.E. tashkiloti bilan hamkorlikni yana-da rivojlantirish, shuningdek, tibbiyot muassasalarini boshqarish, tibbiy xizmatlar ko‘rsatish va texnologiyalarni joriy etishning zamonaviy yondashuvlarini o‘rganishdan iborat.

Bugungi tashrif uchun zamin joriy yil boshida Samarqand viloyati hokimi Adiz Boboyevning AQSHga ishchi safari davomida yaratilgan. O‘shanda Project C.U.R.E. rahbariyati bilan muzokaralar o‘tkazilib, ular yakunlari bo‘yicha qator kelishuvlarga erishilgan.

Shundan so‘ng tashkilot mutaxassislari Samarqand viloyatidagi 10 ta tibbiyot muassasasiga tashrif buyurib, ularning tibbiy jihozlar va inventarlarga bo‘lgan ehtiyojini baholagan. Ushbu ishlar yakunlari bo‘yicha muassasalarga umumiy qiymati 10 million dollarlik jihozlar va inventarlarni beg‘araz topshirish bo‘yicha kelishuvga erishilgan.

Hozirda tayyorlangan jihozlar Project C.U.R.E. omborlarida saqlanmoqda va ularni konteynerlarda Samarqand viloyatiga yetkazib berish rejalashtirilmoqda.

Joriy ishchi tashrif doirasida Project C.U.R.E. rahbariyati va mutaxassislari, shuningdek, AQSHning yetakchi tibbiyot muassasalari vakillari bilan uchrashuv va muzokaralar o‘tkazish rejalashtirilgan. Delegatsiya sog‘liqni saqlashni boshqarishning zamonaviy modellari, tibbiy yordam ko‘rsatish amaliyoti, tibbiy jihozlar logistikasini tashkil etish, tibbiyot muassasalarini modernizatsiya qilish va zamonaviy texnologiyalardan foydalanish bilan tanishish niyatida.

Samarqand viloyatining xususiy tibbiyot sektorini rivojlantirish alohida yo‘nalish bo‘ladi. Viloyat vakillari xususiy klinikalarda qo‘llanilayotgan zamonaviy boshqaruv yondashuvlari va tibbiy texnologiyalar, shuningdek, xalqaro hamkorlik va investitsiya loyihalarini amalga oshirish imkoniyatlarini muhokama qiladi.

Bu yo‘nalishda delegatsiya tarkibida xususiy tibbiyot sektori vakillarining ishtirok etishi muhim ahamiyatga ega. Bu ularga amerikalik hamkasblar bilan tajriba almashish va yangi hamkorlik aloqalarini o‘rnatish imkonini beradi.

Tashrif davomida delegatsiya O‘zbekistonning AQSHdagi elchixonasiga ham borib, O‘zbekistonning AQSHdagi Favqulodda va Muxtor Elchisi Furqat Sidiqov bilan uchrashdi. Tomonlar sog‘liqni saqlash sohasida mintaqalararo hamkorlikni kengaytirish, xorijda yashayotgan vatandoshlarning kasbiy tajribasidan foydalanish va yangi tashabbuslarni amalga oshirish masalalarini muhokama qildi.

Bundan tashqari, Islamic Relief USA va Project C.U.R.E. vakillari bilan muzokaralar o‘tkazildi. Ishtirokchilar Samarqand viloyati tibbiyot muassasalarini zamonaviy jihozlar va zarur vositalar bilan taʼminlash, gumanitar tibbiy yordamni kengaytirish hamda hamkorlikni yana-da rivojlantirish masalalarini muhokama qildi.

Tashrif yakunlari bo‘yicha Project C.U.R.E. bilan hamkorlikni yana-da mustahkamlash, viloyat tibbiyot muassasalarining moddiy-texnik bazasini yangilash hamda davlat va xususiy sog‘liqni saqlash tizimida zamonaviy amaliyotlarni joriy etish kutilmoqda.