Buxoro va Samarqand viloyatlaridagi maktablar ta'mirlandi

Toshkent, O’zbekiston (UzDaily.uz) — Buxoro, Samarqand va Qashqadaryo viloyatlarida umumtaʼlim maktablarini kapital taʼmirlash va rekonstruksiya qilish loyihalari yakunlandi. Ishlar «Qishloq hududlarini barqaror rivojlantirish» va «Qishloq hududlarini kompleks rivojlantirish» (ikkinchi bosqich) loyihalari doirasida amalga oshirildi. Bu haqda O‘zbekiston Iqtisodiyot va moliya vazirligi xabar berdi.

Buxoro viloyati Shofirkon tumanidagi Tezguzar mahallasida joylashgan 6-sonli maktab kapital taʼmirdan chiqarildi. Shu bilan birga, bu yerda 180 nafar o‘quvchiga mo‘ljallangan yangi o‘quv binosi ham qurildi.

Buxoro viloyati Kogon tumanida Bahovuddin Naqshband mahallasida joylashgan 1-sonli maktab binosi kapital taʼmirdan so‘ng yangilangan holda foydalanishga topshirildi.

Samarqand viloyati Narpay tumanidagi Navro‘z mahallasida 42-sonli maktabning mavjud binosi rekonstruksiya qilindi va 120 o‘rinli yangi o‘quv binosi barpo etildi.

Shofirkon tumanidagi yana bir taʼlim muassasasi — Mirzakul mahallasida joylashgan 28-sonli maktab ham kapital taʼmirdan o‘tkazildi.

Qashqadaryo viloyati Qamashi tumanidagi Oynako‘l mahallasida joylashgan 18-sonli maktabda ham taʼmirlash ishlari yakunlandi.

Yangi o‘quv yilida yangilangan taʼlim muassasalarida ularning ochilishiga bag‘ishlangan tadbirlar o‘tkazilmoqda.

Loyihalarni amalga oshirish qishloq hududlarida o‘quvchilar uchun taʼlim olish sharoitlarini yaxshilash va zamonaviy imkoniyatlar yaratishga qaratilgan.