Yevropa Ittifoqi O‘zbekiston kompaniyalariga sanksiya joriy etdi

Toshkent, O‘zbekiston (UzDaily.uz) — Yevropa Ittifoqi Rossiyaga qarshi 20-paket sanksiyalari doirasida paxta sellyulozasi ishlab chiqarish sohasida faoliyat yurituvchi O‘zbekistonning ikki kompaniyasiga nisbatan cheklovlar joriy etdi. Bu haqda Yevropa Ittifoqi Kengashining «Yevropa Ittifoqi rasmiy jurnali»da eʼlon qilingan bayonotida xabar berildi.

Sanksiyalar Farg‘ona paxta sellyulozasi ishlab chiqarish kimyo zavodi hamda Raw Materials Cellulose kompaniyasiga nisbatan qo‘llanildi.

Bundan avval ushbu korxonalarga nisbatan shunga o‘xshash choralar Buyuk Britaniya va Ukraina tomonidan ham joriy etilgan edi. G‘arb davlatlari bahosiga ko‘ra, mazkur kompaniyalar mahsulotlari Rossiya qurolli kuchlari uchun qurol-yarog‘ ishlab chiqarishda qo‘llanilishi mumkin bo‘lgan.

Ikki tuzilma ilgari xorijiy ommaviy axborot vositalari tomonidan o‘tkazilgan qo‘shma surishtiruvda ham tilga olingan. Nashrlarda taʼkidlanishicha, korxonalar paxta sellyulozasini Rossiyaning porox zavodlariga to‘g‘ridan-to‘g‘ri va vositachilar orqali yetkazib bergan. Jurnalistlar maʼlumotiga ko‘ra, bunday yetkazib berish hajmlari 2022 yilda Rossiyaning Ukrainaga keng ko‘lamli bosqini boshlanganidan so‘ng sezilarli darajada oshgan.