Uzbekistan Airways va Boeing Toshkent xalqaro investitsiya forumida Boeing 787 Dreamliner simulyatorini taqdim etmoqda

Toshkent, O’zbekiston (UzDaily.uz) — V Toshkent xalqaro investitsiya forumi doirasida “Uzbekistan Airways” AJ Boeing bilan hamkorlikda Boeing 787 Dreamliner simulyatorli interaktiv hududni taqdim etdi. Forum ishtirokchilari va mehmonlari o‘zlarini dunyodagi eng zamonaviy yo‘lovchi samolyotlaridan birining uchuvchisi sifatida sinab ko‘rishlari mumkin.

Boeing 787 Dreamliner simulyatori bejiz tanlanmagan – bu turdagi havo kemasi o‘n yildan buyon Uzbekistan Airways aviaparkida muvaffaqiyatli foydalanib kelinmoqda. Mazkur loyiha Uzbekistan Airways va Boeing o‘rtasidagi ko‘p yillik strategik sheriklikni, shuningdek, O‘zbekiston zamonaviy aviatsiyasini yanada rivojlantirish yo‘nalishini o‘zida aks ettiradi. Bugungi kunda aviakompaniya Markaziy Osiyodagi Boeing 787 Dreamliner havo kemalarining eng yirik foydalanuvchisi bo‘lib, yana 22 ta zamonaviy Boeing havo kemasini yetkazib berish bo‘yicha imzolangan shartnoma doirasida o‘z aviaparkini izchil yangilashda davom etmoqda.

Toshkent xalqaro investitsiya forumi iqtisodiy rivojlanish, sarmoyalar va texnologik hamkorlik masalalarini muhokama qilish uchun asosiy xalqaro maydonlardan biri bo‘lib, davlat rahbarlari, biznes vakillari, investorlar hamda dunyoning yetakchi kompaniyalarini birlashtiradi.