Toshkent, O’zbekiston (UzDaily.uz) — O‘zbekiston Prezidenti Shavkat Mirziyoyev 9 oktyabr kuni Vazirlar Mahkamasining ijro etuvchi tuzilmasini yana-da takomillashtirish to‘g‘risidagi farmonni imzoladi.
Hujjat 12 oktyabr kuni qonunchilikning milliy bazasida eʼlon qilindi. Unga muvofiq, Bosh vazirning birinchi o‘rinbosari — taʼlim va fan vaziri Erkinjon Turdimovga taʼlim, fan va sog‘liqni saqlash sohalaridagi qator idoralar faoliyatini muvofiqlashtirish vakolatlari yuklatildi.
Turdimov ushbu lavozimga 9 oktyabr kuni tayinlangan edi. Bunga qadar u Sirdaryo viloyatiga rahbarlik qilgan.
Farmonga ko‘ra, Bosh vazirning birinchi o‘rinbosari o‘z vakolati doirasida taʼlim, fan va sog‘liqni saqlash masalalari bo‘yicha vazirliklar, qo‘mitalar, agentliklar va inspeksiyalar rahbarlari, shuningdek, Qoraqalpog‘iston Respublikasi Vazirlar Kengashi Raisi hamda viloyatlar va Toshkent shahri hokimlari faoliyatini muvofiqlashtiradi.
Turdimovga biriktirilgan idoralar ro‘yxatiga Taʼlim va fan vazirligi hamda unga bo‘ysunuvchi, ixtisoslashtirilgan taʼlim muassasalari, professional taʼlim, innovatsion rivojlanish, bilim va malaka darajasini baholash uchun masʼul tuzilmalar kiritildi.
Shuningdek, uning muvofiqlashtiruvi doirasiga Sog‘liqni saqlash vazirligi, Sanitariya-epidemiologik osoyishtalik va jamoat salomatligi qo‘mitasi, Farmatsevtika tarmog‘ini rivojlantirish agentligi hamda Klinik audit inspeksiyasi kiritildi.
Ichki ishlar vazirligi Bosh vazirning birinchi o‘rinbosari bilan taʼlim muassasalarida, shuningdek, o‘quvchi va talabalar orasida huquqbuzarliklar hamda zo‘ravonlik bilan bog‘liq jinoyatlarning oldini olish masalalari bo‘yicha hamkorlik qiladi.
Yoshlar ishlari agentligi taʼlim, kasb-hunar o‘rganish va yoshlarni tarbiyalash masalalari bo‘yicha ishlarda ishtirok etadi. Idoralar ro‘yxatiga Fanlar akademiyasi ham kiritilgan.
Boshqa vazirliklar, qo‘mitalar, agentliklar va inspeksiyalar Turdimov bilan taʼlim, fan va sog‘liqni saqlashga taalluqli vazifalar doirasida hamkorlik qiladi. Qoraqalpog‘iston Respublikasi Vazirlar Kengashi Raisi, shuningdek, viloyatlar va Toshkent shahri hokimlarining o‘rinbosarlari uchun ham tegishli hamkorlik va muvofiqlashtirish yo‘nalishlari belgilangan.
Farmonda Davlat xavfsizlik xizmati bilan giyohvandlik vositalarining noqonuniy aylanmasi, yoshlarni jinoiy guruhlarga jalb qilish, diniy ekstremizm va terrorizmning oldini olish masalalari bo‘yicha hamkorlik qilish alohida belgilab qo‘yilgan.
Milliy gvardiya o‘quvchi va talabalarni vatanparvarlik ruhida tarbiyalash, ularda mamlakat taqdiriga daxldorlik tuyg‘usini mustahkamlash hamda sog‘lom turmush tarzini targ‘ib qilish ishlariga jalb etiladi.
Vazirlar Mahkamasi tuzilmasida taʼlim, fan va sog‘liqni saqlash masalalari bo‘yicha 12 shtat birligidan iborat kotibiyat tashkil etiladi.
Uning besh nafar xodimi Vazirlar Mahkamasining Ijtimoiy rivojlantirish masalalari bo‘yicha bo‘limidan o‘tkaziladi. Qolgan yettita shtat birligi maktabgacha va maktab taʼlimi, shuningdek, oliy taʼlim, fan va innovatsiyalar vazirliklari qayta tashkil etilishi munosabati bilan ularning shtatlarini maqbullashtirish hisobiga shakllantiriladi.
Shu bilan birga, Vazirlar Mahkamasining Ijtimoiy rivojlantirish masalalari bo‘yicha bo‘limi Madaniyat va sport masalalari bo‘yicha bo‘lim deb qayta nomlanadi. Hukumat ijro etuvchi tuzilmasidagi boshqaruv xodimlarining umumiy soni 243 nafar etib belgilandi.
Hukumatga ikki hafta muddatda Bosh vazirning birinchi o‘rinbosari — taʼlim va fan vazirining funksional vazifalarini hamda uning kotibiyati to‘g‘risidagi nizomni tasdiqlash haqida qaror qabul qilish topshirildi.
12 oktyabr kuni Yangi Toshkentda bo‘lib o‘tgan uchrashuvda Mirziyoyev Turdimovning tayinlanishi sabablarini tushuntirdi. Prezidentning aytishicha, oliy taʼlim muassasalari soni ko‘payishi fonida oliy taʼlim sifati pasayib borayotgani uni tashvishga solmoqda.
«Men eng ko‘p ishonadigan insonni olib kelib, taʼlim vaziri etib tayinladim. Chunki oliy taʼlim muassasalari soni ko‘paydi, ammo sifat pasaydi. Bu meni juda qattiq tashvishga solmoqda», — dedi davlat rahbari.
Mirziyoyev, shuningdek, Turdimov ilgari to‘rtta viloyatga rahbarlik qilganini taʼkidladi va unga Bosh vazirning birinchi o‘rinbosari maqomi berilishini taʼlimga alohida eʼtibor qaratish zarurati bilan izohladi.
«Men unga Bosh vazirning birinchi o‘rinbosari maqomini bejiz bermadim — taʼlimga katta eʼtibor qaratish uchun. Endi davlatning tibbiyot va taʼlimga munosabati butunlay o‘zgaradi», — deya taʼkidladi prezident.
