Toshkentda "Kelajak muhandislari" festivali bo'lib o'tdi

Toshkent, O‘zbekiston (UzDaily.uz) — Toshkentda Oliy ta’lim, fan va innovatsiyalar vazirligi tashabbusi bilan “Kelajak muhandislari” xalqaro festivali bo‘lib o‘tdi. Ushbu yirik tadbir innovatsiyalar, muhandislik yechimlari va yoshlar salohiyatini namoyish etish uchun muhim maydonga aylandi.

Festival minglab ishtirokchilarni, oliy ta’lim muassasalari vakillarini, xalqaro ekspertlar va turli mamlakatlardan kelgan yosh dasturchilarni birlashtirdi. Tadbirda BMT Taraqqiyot Dasturining O‘zbekistondagi doimiy vakilasi Akiko Fujii ham ishtirok etdi.

U o‘z nutqida O‘zbekiston uchun bilimga asoslangan iqtisodiyot sari yo‘nalish strategik ahamiyatga ega ekanini ta’kidladi. Shuningdek, muhandislik va STEM barqaror o‘sishning muhim drayverlari ekanini qayd etib, inson kapitaliga sarmoya kiritish, yoshlar imkoniyatlarini kengaytirish hamda ayollar va qizlar uchun texnologik sohalarda ta’lim va mehnat qilish sharoitlarini yaratish zarurligini alohida urg‘uladi.

U, shuningdek, BMT Taraqqiyot Dasturi tomonidan raqamli ko‘nikmalarni rivojlantirish, stajirovkalar tashkil etish va ayollarni STEM sohasida qo‘llab-quvvatlashga qaratilgan tashabbuslar amalga oshirilayotganini ta’kidladi. Tashkilot kelajak muhandislarining salohiyatini ro‘yobga chiqarish, innovatsiyalarni kengaytirish va inklyuziv rivojlanishni ilgari surishda O‘zbekistonni qo‘llab-quvvatlashda davom etadi.