Toshkentda «Ipak yo‘li» Xitoy tovarlari ko‘rgazmasi o‘tkaziladi
Toshkent, O’zbekiston (UzDaily.uz) — To‘qqizinchi "Ipak yo‘li" Xitoy tovarlari ko‘rgazmasi 2-4 sentyabr kunlari Toshkentda bo‘lib o‘tadi, unda taxminan 200 ta Xitoy kompaniyasi ishtirok etadi. Tadbir Central Asia Exhibition Center (CAEx) ko‘rgazma majmuasida tashkil etiladi.
Ko‘rgazma O‘zbekiston va Xitoy tadbirkorlari o‘rtasida savdo va investitsiyaviy hamkorlikni rivojlantirish uchun maydonga aylanadi. Ishtirokchilar yangi ishbilarmonlik aloqalarini o‘rnatishi va turli tarmoqlarda hamkorlik qilish imkoniyatlarini muhokama qilishi mumkin.
Ko‘rgazmaning asosiy yo‘nalishlari qatorida aqlli ishlab chiqarish va raqamli texnologiyalar, yashil energetika va energiya samaradorligi, qishloq xo‘jaligi hamda qishloq xo‘jaligi texnikasi o‘rin olgan.
Shuningdek, qurilish materiallari va muhandislik texnikasi, tibbiy uskunalar va sog‘liqni saqlash sohasidagi yechimlar, avtomobil ehtiyot qismlari, yengil sanoat mahsulotlari, to‘qimachilik va isteʼmol tovarlari namoyish etiladi.
Ko‘rgazma doirasida kompaniyalar vakillari o‘rtasida B2B uchrashuvlari, sanoat forumlari va tarmoq taqdimotlarini o‘tkazish rejalashtirilgan.
Tashkilotchilar tadbir ikki mamlakat tadbirkorlari o‘rtasida savdo hamkorligini kengaytirish, investitsiyaviy aloqalarni rivojlantirish va yangi ishbilarmonlik munosabatlarini o‘rnatishga xizmat qiladi, deb hisoblamoqda.
