O‘zbekiston va Jahon banki soliq maʼmurchiligini rivojlantirmoqda
Toshkent, O’zbekiston (UzDaily.uz) — O‘zbekiston Soliq qo‘mitasida Global soliq dasturi (GTP) doirasida mamlakatga texnik ko‘mak missiyasi bilan kelgan Jahon banki mutaxassislari bilan uchrashuv bo‘lib o‘tdi. Missiyaning ish tashrifi 2026 yil 24–28 avgust kunlari davom etmoqda. Bu haqda O‘zbekiston Soliq qo‘mitasi xabar berdi.
Muzokaralarda Jahon bankining boshqaruv masalalari bo‘yicha yetakchi mutaxassisi va loyiha rahbari Yan Lyoprik boshchiligidagi vakillar hamda Soliq qo‘mitasi mutaxassislari ishtirok etdi. Tomonlar asosiy eʼtiborni soliq maʼmurchiligini yana-da takomillashtirish va zamonaviy raqamli yechimlarni joriy etishga qaratdi.
Xususan, ishtirokchilar Soliq maʼlumotlarini qayta ishlash va saqlash markazi infratuzilmasini rivojlantirish, idoralararo axborot almashinuvini kengaytirish, shuningdek, qo‘shilgan qiymat solig‘i va elektron hisobvaraq-fakturalar bo‘yicha maʼlumotlarni tahlil qilish mexanizmlarini takomillashtirish masalalarini muhokama qildi.
Alohida yo‘nalish sifatida xavflarni baholash asosida soliq auditi tizimini rivojlantirish masalasi ko‘rib chiqildi. Tomonlar maʼlumotlarni tahlil qilishda zamonaviy yondashuvlarni yana-da qo‘llash va soliq maʼmurchiligi samaradorligini oshirish masalalarini muhokama qildi.
Jahon banki uzoq vaqtdan beri islohotlarni amalga oshirishda Soliq qo‘mitasining asosiy xalqaro hamkorlaridan biri hisoblanadi. Hamkorlik doirasida soliq maʼmurchiligini modernizatsiya qilish bo‘yicha keng ko‘lamli loyiha amalga oshirildi. U asosiy biznes jarayonlarini avtomatlashtirish, maʼlumotlarni qayta ishlash infratuzilmasini rivojlantirish, yashirin iqtisodiyotni qisqartirish va soliq organlarining institutsional salohiyatini mustahkamlashni nazarda tutgan.
Jahon banki ko‘magida raqamli soliqqa tortish, elektron tijorat, soliq tafovutini tahlil qilish va soliq organlari faoliyatida zamonaviy texnologiyalardan foydalanishga bag‘ishlangan xalqaro seminarlar hamda ekspertlik tadbirlari muntazam o‘tkazib kelinmoqda.
Avval amalga oshirilgan loyiha to‘liq yakunlangan. Ayni paytda tomonlar uning yakunlanganini huquqiy jihatdan rasmiylashtirish uchun zarur tartib-taomillarni amalga oshirmoqda, hamkorlik esa Global soliq dasturi doirasida davom ettirilmoqda.
Uchrashuv yakunlari bo‘yicha Soliq qo‘mitasi va Jahon banki O‘zbekistonda soliq maʼmurchiligini raqamli transformatsiya qilish bo‘yicha hamkorlikni va qo‘shma ishlarni davom ettirishdan manfaatdor ekanini tasdiqladi.
