Toshkent shahar hokimining yangi o'rinbosarlari tayinlandi

Toshkent, O‘zbekiston (UzDaily.uz) — Toshkent shahri hokimiyatida kadrlar bo‘yicha yangi tayinlovlar amalga oshirildi. Dauletiyar Xudaybergenov poytaxt hokimining moliya, iqtisodiyot va kambag‘allikni qisqartirish masalalari bo‘yicha birinchi o‘rinbosari lavozimiga tasdiqlandi, shuningdek Iqtisodiyot va moliya bosh boshqarmasi boshlig‘i etib tayinlandi.

Dauletiyar Xudaybergenov 1990 yilda Nukus shahrida tug‘ilgan. U Toshkent davlat yuridik universitetida tahsil olgan bo‘lib, 2013 yilda bakalavriatni, 2015 yilda esa magistraturani tamomlagan. 2024 yilda Sankt-Peterburg davlat iqtisodiyot universitetida qayta tayyorlovdan o‘tgan, 2025 yilda esa O‘zbekiston Respublikasi Bank-moliya akademiyasi magistraturasini yakunlagan.

Mehnat faoliyatini 2014 yilda boshlagan va shu vaqt mobaynida bir qator masʼul lavozimlarda ishlagan. Prezident Administratsiyasida ishlagan davrida xalqaro moliya institutlari ishtirokidagi loyihalarni amalga oshirish, ularni moliyalashtirish mexanizmlarini takomillashtirish, yuqori likvidli va monopol tovarlar muomalasi jarayonlariga bozor instrumentlarini joriy etish, shuningdek sanoatning eksport salohiyatini oshirish va qurilish hamda kommunal sohalarni isloh qilishga qaratilgan tashabbuslarda ishtirok etgan. Tayinlovga qadar Prezident Administratsiyasining Huquqiy ekspertiza va kompleks tahlil departamenti boshqarmasi boshlig‘i lavozimida faoliyat yuritgan.

Yana bir qarorga ko‘ra, Alisher Dusmuxamedov Toshkent shahri hokimining axborot texnologiyalarini joriy etish masalalari bo‘yicha o‘rinbosari etib tayinlandi va bir vaqtning o‘zida Raqamli rivojlanish departamentiga rahbarlik qiladi.

Alisher Dusmuxamedov 1981 yilda Toshkent shahrida tug‘ilgan. U 2002 yilda Toshkent elektrotexnika aloqa institutini, 2006 yilda Toshkent davlat iqtisodiyot universitetini, 2013 yilda Strategik tahlil va prognozlash oliy maktabini, 2021 yilda esa Toshkent axborot texnologiyalari universitetini tamomlagan.

Mehnat faoliyatini 2003 yilda boshlagan va turli masʼul lavozimlarda ishlagan. 2023 yil mart oyidan buyon O‘zbekiston Respublikasi Iqtisodiyot va moliya vazirligi huzuridagi Bojxona qo‘mitasining axborot-kommunikatsiya texnologiyalari va kiberxavfsizlikni taʼminlash boshqarmasiga rahbarlik qilib kelayotgan edi.