Qozog‘istondagi avariya O‘zbekistonda elektr uzilishlariga sabab bo‘ldi
Toshkent, O’zbekiston (UzDaily.uz) — O‘zbekistonda Qozog‘iston energetika tizimida yuz bergan avariyadan so‘ng elektr taʼminotida uzilishlar kuzatildi. Avariya Markaziy Osiyoning yagona energetika tizimi ishiga taʼsir ko‘rsatgan. Hozirda mamlakat elektr tarmoqlarida kuchlanishni uzatish bosqichma-bosqich tiklanmoqda. Bu haqda O‘zbekiston Energetika vazirligi xabar berdi.
«O‘zbekiston milliy elektr tarmoqlari» matbuot xizmatining maʼlum qilishicha, mutaxassislar avariya oqibatlarini bartaraf etish va energetika tizimining normal ishlashini tiklash bo‘yicha ish olib bormoqda.
Avariya 14 avgust kuni soat 14:38 da sodir bo‘lgan. L-5400, L-5300 va L-5320 elektr uzatish liniyalari o‘chirilganidan so‘ng «Alatau Jariq Kompaniyasi» AJ tarmoqlarida avariyaga qarshi avtomatika ishga tushgan.
Natijada Olmaota shahri va Olmaota viloyatidagi isteʼmolchilarning bir qismi elektr energiyasisiz qolgan. Mahalliy OAV maʼlumotlariga ko‘ra, uzilgan yuklama hajmi 300 MVtni tashkil etgan.
O‘zbekistonda isteʼmolchilarning elektr taʼminoti Qozog‘iston energetika tizimidagi avariya oqibatlari bartaraf etilgani sari bosqichma-bosqich tiklanmoqda.
