Nijnekamskda O‘zbekistonning sakkiz nafar fuqarosi halok bo‘ldi
Toshkent, O’zbekiston (UzDaily.uz) — 10 avgust kuni ertalab Rossiyaning Tatarstan Respublikasi Nijnekamsk shahridagi qator obyektlarga uchuvchisiz uchish apparatlari hujumi oqibatida O‘zbekistonning sakkiz nafar fuqarosi halok bo‘ldi. Yana bir necha nafar O‘zbekiston fuqarosi turli darajadagi jarohatlar olgan va shifoxonaga yotqizilgan. Bu haqda O‘zbekiston Favqulodda vaziyatlar vazirligi xabar berdi.
Favqulodda vaziyatlar vazirligining dastlabki maʼlumotlariga ko‘ra, halok bo‘lgan O‘zbekiston fuqarolari Nijnekamskdagi qurilish korxonalaridan birida quruvchi bo‘lib ishlagan.
O‘zbekiston Prezidenti Shavkat Mirziyoyev topshirig‘iga ko‘ra, Vazirlar Mahkamasi Bosh vazir o‘rinbosari Ochilbek Ramatov rahbarligida hukumat komissiyasini tuzdi. Komissiyaga jabrlangan fuqarolarni borib ko‘rish va ularga zarur yordam ko‘rsatish, halok bo‘lganlarning jasadlarini maxsus aviareys orqali vatanga olib kelishni tashkil etish hamda ularning oilalariga har tomonlama yordam ko‘rsatish vazifasi yuklatildi.
Rossiyaga Favqulodda vaziyatlar vazirligi, Tashqi ishlar vazirligi, Sog‘liqni saqlash vazirligi, Migratsiya agentligi va boshqa masʼul idoralar vakillaridan iborat maxsus ishchi guruh yuborildi. O‘zbekistonning Qozon shahridagi Bosh konsulxonasi va Migratsiya agentligi vakillari voqea joyiga allaqachon yetib borgan va Rossiyaning vakolatli organlari bilan harakatlarni muvofiqlashtirmoqda.
Favqulodda vaziyatlar vazirligi hozirda jabrlanganlarga yordam ko‘rsatish hamda halok bo‘lgan O‘zbekiston fuqarolarini vatanga qaytarishni tashkil etish bo‘yicha zarur choralar ko‘rilayotganini maʼlum qildi.
