Sog‘liqni saqlash vazirligi «Elektron retsept» tizimi bekor qilinganini rad etdi

Toshkent, O‘zbekiston (UzDaily.uz) — O‘zbekiston Respublikasi Sog‘liqni saqlash vazirligi ijtimoiy tarmoqlarda tarqalgan «Elektron retsept» tizimi go‘yoki bekor qilingani haqidagi xabarlarni rad etdi. Muhokamalarga jamoatchilik muhokamasi uchun hujjatlar portaliga joylashtirilgan «“Elektron retsept” tizimini bosqichma-bosqich joriy etish to‘g‘risidagi buyruqni o‘z kuchini yo‘qotgan deb topish haqida»gi normativ-huquqiy hujjat loyihasi sabab bo‘lgan.

Vazirlikda taʼkidlanishicha, ayrim nashrlarda hujjat mazmuni noto‘g‘ri talqin qilingan. Qayd etilishicha, Sog‘liqni saqlash vazirligining 2025 yil 15 dekabrdagi 25-sonli buyrug‘i elektron retseptlar bo‘yicha beriladigan dori vositalari ro‘yxatini bosqichma-bosqich shakllantirishni nazarda tutadi.

Birinchi bosqichda tizimdan majburiy foydalanish tizimli taʼsirga ega antibiotiklar, sintetik antibakterial preparatlar va gormonal dori vositalari uchun joriy etilgan.

Taqdim etilgan buyruq loyihasida esa tizimni bekor qilish emas, balki uni kengaytirish nazarda tutilgan. Hujjatga ko‘ra, Toshkent shahridagi tibbiyot muassasalari va dorixonalarda, shuningdek, tajriba-sinov loyihasi amalga oshirilayotgan 15 ta pilot tuman va shaharda «Elektron retsept» tizimiga to‘liq o‘tish rejalashtirilgan.

Shu bilan birga, ayrim kuchli taʼsir qiluvchi dori vositalari, tarkibida narkotik va psixotrop moddalar bo‘lgan preparatlar, shuningdek, reimbursatsiya dasturi bilan bog‘liq jarayonlar uchun istisnolar saqlanib qoladi.

Sog‘liqni saqlash vazirligida taʼkidlanishicha, mazkur tizim bosqichma-bosqich joriy etishda davom etmoqda va dori vositalari muomalasini yana-da raqamlashtirishga qaratilgan.