Toshkent, O’zbekiston (UzDaily.uz) — Qozon shahrida Shanxay hamkorlik tashkiloti (SHHT)ga aʼzo davlatlar bosh prokurorlarining 24-yig‘ilishi O‘zbekiston vakillari ishtirokida bo‘lib o‘tdi.
Tadbirda Belarus, Hindiston, Eron, Qozog‘iston, Xitoy, Qirg‘iziston, Pokiston, Tojikiston va O‘zbekiston vakolatli organlari vakillari, shuningdek, SHHT Kotibiyati va SHHTning Mintaqaviy aksilterror tuzilmasi vakillari ishtirok etdi.
Kuzatuvchi sifatida Mongoliya delegatsiyasi qatnashdi. Ozarbayjon, Qatar, Laos, Maldiv orollari, Myanma, Nepal, Saudiya Arabistoni, Turkiya va Shri-Lanka vakillari SHHTning muloqot bo‘yicha hamkorlari sifatida ishtirok etdi.
Uchrashuvning asosiy mavzusi voyaga yetmaganlar o‘rtasida huquqqa xilof kontent tarqalishining oldini olish hamda anʼanaviy oilaviy qadriyatlarni himoya qilish bilan bog‘liq masalalar bo‘ldi.
Ishtirokchilar huquqni qo‘llash sohasidagi tajriba almashdi, yoshlarga destruktiv taʼsir ko‘rsatilishining oldini olish bo‘yicha amaliy choralarni muhokama qildi va keyingi hamkorlik yo‘nalishlarini belgiladi.
Yig‘ilish yakunlari bo‘yicha ishtirokchilar voyaga yetmaganlarni ularga zarar yetkazishi mumkin bo‘lgan materiallardan himoya qilish sohasida xalqaro hamkorlikni rivojlantirishni nazarda tutuvchi protokolni imzoladi. Tomonlar internetda bunday kontentni aniqlash, cheklash va tarqalishining oldini olish sohasida axborot, tajriba va huquqni qo‘llash faoliyati natijalari bilan almashishga kelishib oldi.
SHHTga aʼzo davlatlar prokuraturalarining taʼlim, ilmiy-taʼlim va ilmiy-amaliy tashkilotlari o‘rtasidagi hamkorlikka ham alohida eʼtibor qaratildi.
Shuningdek, tajriba almashish va voyaga yetmaganlar uchun xavfsiz axborot muhitini taʼminlash bo‘yicha chora-tadbirlarni ishlab chiqish maqsadida qo‘shma tadbirlar o‘tkazish rejalashtirildi.
SHHTga aʼzo davlatlar bosh prokurorlarining navbatdagi yig‘ilishi 2027 yilda O‘zbekistonda bo‘lib o‘tadi.
Shanxay hamkorlik tashkiloti 2001 yilda tashkil etilgan.
Hozirgi vaqtda unga o‘nta davlat: Belarus, Hindiston, Eron, Qozog‘iston, Xitoy, Qirg‘iziston, Pokiston, Rossiya, Tojikiston va O‘zbekiston aʼzo hisoblanadi.
SHHTga aʼzo davlatlar bosh prokurorlarining birinchi yig‘ilishi 2002 yilda Shanxay shahrida bo‘lib o‘tgan.
