Toshkent, O’zbekiston (UzDaily.uz) — O‘zbekiston Respublikasi Adliya akademiyasi xalqaro taʼlim reytingida salmoqli natija qayd etdi.
UI GreenMetric World University Rankings 2026 natijalariga ko‘ra, Akademiya dunyoning 110 mamlakatidagi 2 mingdan ortiq oliy taʼlim muassasalari orasida 901-o‘rinni egallab, xalqaro reyting ishtirokchilarining birinchi mingtaligiga kirdi.
Ushbu natija Akademiyaning barqaror rivojlanish, zamonaviy taʼlim muhitini shakllantirish va ekologik masʼuliyatni oshirish kabi yo‘nalishlardagi faoliyatini aks ettiradi.
UI GreenMetric World University Rankings reytingi oliy taʼlim muassasalarining barqaror rivojlanish va ekologik kun tartibiga qo‘shayotgan hissasi nuqtai nazaridan faoliyatini baholaydi.
Reyting doirasida taʼlim muassasalari faoliyatining infratuzilmani rivojlantirish, ekologik siyosat va qulay taʼlim muhitini yaratish bilan bog‘liq turli jihatlari hisobga olinadi.
Adliya akademiyasining xalqaro reyting TOP-1000 taligiga kirishi uning xalqaro taʼlim makonidagi ishtirokini kengaytirish va xalqaro darajada tanilishi ortib borayotganini ko‘rsatuvchi ko‘rsatkichlardan biri hisoblanadi.
Qayd etilgan natija, shuningdek, Akademiyaning taʼlim va barqaror rivojlanish sohasidagi zamonaviy xalqaro yondashuvlarga mos kelishga intilayotgani, shuningdek, dolzarb ekologik va ijtimoiy tamoyillarni inobatga olgan holda taʼlim infratuzilmasini izchil rivojlantirayotganidan dalolat beradi.
