Sherzod Hidoyatov O‘zbekiston og‘ir atletika federatsiyasi raisi etib saylandi

Toshkent, O‘zbekiston (UzDaily.uz) — Qurilish va kommunal xo‘jalik vaziri Sherzod Hidoyatov O‘zbekiston og‘ir atletika federatsiyasi raisi etib saylandi.

Uning nomzodi 2024-yil yakuni va 2025-yilga mo‘ljallangan rejalar muhokamasi doirasida o‘tkazilgan hisobot-saylov yig‘ilishida tasdiqlandi.

Shu paytgacha, 2012-yildan buyon federatsiyaga Batir Zakirov rahbarlik qilib kelgan. U 2024-yil iyul oyida sog‘lig‘idagi muammolar tufayli qurilish va kommunal xo‘jalik vaziri lavozimini tark etgan edi.

Shundan so‘ng, vazirlik rahbarligi uning birinchi o‘rinbosari – Sherzod Hidoyatovga yuklatilgan va endilikda u sport tashkiloti rahbarligini ham o‘z zimmasiga oldi.