Saidov: MDH hamkorlikni kuchaytirish qarorlarini qabul qildi

Toshkent, O‘zbekiston (UzDaily.uz) — O‘zbekiston tashqi ishlar vaziri Baxtiyor Saidov Moskva shahrida bo‘lib o‘tgan Mustaqil Davlatlar Hamdo‘stligi tashqi ishlar vazirlari kengashining kengaytirilgan yig‘ilishi yakunlari haqida maʼlum qildi.

Uning so‘zlariga ko‘ra, uchrashuv davomida qo‘shma ish faoliyati yakunlari sarhisob qilindi va kelgusi hamkorlik yo‘nalishlari belgilab olindi. Joriy yil oktyabr oyida Turkmanistonda o‘tkazilishi rejalashtirilgan MDH davlat rahbarlari kengashi yig‘ilishiga tayyorgarlik masalalariga alohida eʼtibor qaratildi.

Muzokaralar doirasida tomonlar ko‘p tomonlama hamkorlikni mustahkamlashga qaratilgan 10 ta qarorni kelishib oldi va qabul qildi. TIV rahbari taʼkidlashicha, erishilgan kelishuvlar davlatlar o‘rtasidagi yaqinlashuv, barqarorlikni taʼminlash va MDH hududida izchil ijtimoiy-iqtisodiy rivojlanish uchun asos bo‘lib xizmat qiladi.

Shuningdek, Qozog‘iston, Qirg‘iziston, Tojikiston, Turkmaniston va Rossiya delegatsiyalari ishtirokida «Markaziy Osiyo + Rossiya» formatida tashqi ishlar vazirlarining alohida uchrashuvi bo‘lib o‘tdi. Unda oltitomonlama hamkorlikning dolzarb masalalari va uni yana-da rivojlantirish bo‘yicha takliflar ko‘rib chiqildi.

Tomonlar iqtisodiy hamkorlikni rivojlantirish, qo‘shma loyihalarni amalga oshirish, shuningdek ekologik muammolarni hal etish choralarini muhokama qildi. Ayniqsa, “yashil” energetika, suv resurslaridan oqilona foydalanish va atrof-muhitni muhofaza qilish masalalariga katta eʼtibor qaratildi.

Ishtirokchilar xalqaro vaziyat murakkablashib borayotgan sharoitda mintaqaviy xavfsizlikni mustahkamlash muhimligini va barqaror rivojlanishni taʼminlash uchun saʼy-harakatlarni muvofiqlashtirish zarurligini taʼkidladi.

Tadbirlar yakunida ko‘p tomonlama hamkorlikni kengaytirish, madaniy-gumanitar aloqalarni mustahkamlash va mintaqada barqarorlikni taʼminlash masalalari bo‘yicha fikr almashildi.

Baxtiyor Saidov Rossiya tashqi ishlar vaziri Sergey Lavrov va tadbir tashkilotchilariga uchrashuvlarni yuqori darajada tashkil etgani uchun minnatdorlik bildirib, erishilgan kelishuvlar mamlakatlar o‘rtasida strategik sheriklik va do‘stona munosabatlarni yana-da mustahkamlashga xizmat qilishini qayd etdi.